"Unibank"ın qeyri-faiz xərclərində 27%-lik artım - Hansı ödənişlərin payına düşüb?

“Unibank”ın  2026-cı ilin I rübü üzrə maliyyə hesabatına əsasən, bankın qeyri-faiz xərcləri illik müqayisədə 27,2% artaraq 62 milyon 884 min manata yüksəlib.

Valyuta.az xəbər verir ki, 2025-ci ilin eyni dövründə bu göstərici 49 milyon 458 min manat olub.

Hesabat dövründə qeyri-faiz xərclərinin əsas hissəsini əmək haqqı və digər kompensasiya növləri üzrə xərclər təşkil edib. Bu istiqamətdə xərclər illik müqayisədə 31,7% artaraq 23 milyon 454 min manata çatıb.

Bankın ümumi və inzibati xərcləri 34,2% artımla 13 milyon 916 min manat, amortizasiya xərcləri isə 23,6% artaraq 3 milyon 730 min manat olub.

Digər xərclər üzrə göstərici də yüksələrək 21 milyon 783 min manat təşkil edib ki, bu da ötən ilin eyni dövrü ilə müqayisədə 19,4% çoxdur.

Maliyyə hesabatı göstərir ki, qeyri-faiz xərclərindəki artım əsasən əməliyyat və personal xərclərinin yüksəlməsi ilə bağlı olub.

Mayya Hüseynova