"Goldman Sachs" 1 trilyonluq birləşmə və satınalma həddini keçən ilk investisiya bankı oldu

"Goldman Sachs" bu ilin əvvəlindən etibarən ümumi dəyəri 1 trilyon dolları ötən qlobal birləşmə və satınalma (M&A) əməliyyatlarında məsləhətçi qismində iştirak edərək yeni rekord müəyyənləşdirib.

Valyuta.az xəbər verir ki, "Dealogic" məlumatlarına əsasən, bu göstəriciyə ilin ilk altı ayı ərzində çatan ilk investisiya bankı məhz Goldman Sachs olub.

Bank bu nəticəni son aylarda iştirak etdiyi iri həcmli əməliyyatlarla əlaqələndirib. Bunlardan biri ötən ay açıqlanan və 67 milyard dollar dəyərində qiymətləndirilən "Dominion Energy" şirkətinin "NextEra Energy" tərəfindən alınmasıdır. "Goldman Sachs" bu sövdələşmədə maliyyə məsləhətçilərindən biri kimi çıxış edib.

"Goldman Sachs"ın investisiya bankçılığı üzrə komissiya gəlirləri ilin ilk rübündə 48% artaraq 2,8 milyard dollara yüksəlib.

"PwC"nin hesablamalarına görə, qlobal "M&A" bazarının həcmi 2026-cı ildə 4 trilyon dollara çata bilər ki, bu da ötən illə müqayisədə 13% artım deməkdir. Hazırda iri sövdələşmələr qlobal "M&A" bazarının ümumi dəyərinin 48%-ni təşkil edir.

"Fitch Ratings" agentliyinin baş direktoru Mark Narron bildirib ki, "Goldman Sachs" artıq 90 rübdən çoxdur "M&A "məsləhətçiliyi üzrə qlobal liderdir və hazırkı iri sövdələşmə dalğası bankın güclü bazar mövqeyini bir daha təsdiqləyir.

Sərvanə Rəmixanova