“JPMorgan” ABŞ bankçılıq tarixində ən yüksək rüblük mənfəət əldə edib

ABŞ-ın ən böyük bankı “JPMorgan Chase” (JPM) ölkə bankçılıq tarixində indiyədək qeydə alınmış ən yüksək rüblük mənfəəti açıqlayıb.

Valyuta.Az xəbər verir ki, bank 2025-ci ilin ikinci rübündə xalis mənfəətini ötən ilin eyni dövrü ilə müqayisədə 41 faiz artıraraq 21,2 milyard dollara çatdırıb. Bu, hər səhmə görə 7,70 dollar mənfəət deməkdir və analitiklərin proqnozlaşdırdığı 5,64 dolları əhəmiyyətli dərəcədə üstələyib. Ümumi xalis gəlir isə ötən ilin eyni dövründəki 45 milyard dollardan 28 faiz artaraq 57 milyard dollara yüksəlib.

“JPMorgan”ın icraçı direktoru Ceymi Daymon (Jamie Dimon) bildirib ki, rekord nəticələr “xüsusilə əlverişli bazar mühiti, yüksək bazar aktivliyi, səmərəli icra, uzun illər ərzində həyata keçirilən investisiyalar və düşünülmüş kapital yerləşdirilməsinin nəticəsidir”.

Onun sözlərinə görə, ABŞ iqtisadiyyatı bu il diqqətəlayiq dayanıqlılıq nümayiş etdirib. Daymon buna süni intellekt sahəsinə yönələn kapital qoyuluşlarını, fiskal stimullaşdırmanı və tənzimləmələrin yumşaldılmasını əsas amillər kimi göstərib.

Bununla yanaşı, o, geosiyasi risklərin artdığına da diqqət çəkib.

“Geosiyasi gərginliklər, müharibələr, davamlı yüksək inflyasiya, böyük qlobal fiskal kəsirlər və aktivlərin yüksək qiymətləndirilməsi də daxil olmaqla bir sıra risklər mövcuddur. Bu amillərin necə nəticələnəcəyini əvvəlcədən proqnozlaşdırmaq mümkün deyil”, – deyə Daymon bildirib.

Bank mənfəətdəki əhəmiyyətli artımı korporativ bölməsinin “Visa” səhmləri üzrə 4,6 milyard dollarlıq xalis gəliri və bəzi səhm investisiyalarından əldə olunan əlavə 1 milyard dollarlıq gəlirlə əlaqələndirib.

Bu birdəfəlik gəlirlər nəzərə alınmasa belə, “JPMorgan”ın 16,9 milyard dollarlıq xalis mənfəəti bazar gözləntilərini əhəmiyyətli dərəcədə üstələyib.

Analitiklərin fikrincə, “JPMorgan”ın nəticələri ABŞ-ın iri bankları üçün növbəti uğurlu maliyyə hesabatı mövsümünün başlanğıcına işarə edir. “Wall Street”də aktivliyin artması, xüsusilə investisiya bankçılığı və ticarət əməliyyatlarının canlanması sektorun maliyyə göstəricilərinə müsbət təsir göstərir.

“Bank of America”, “Citigroup”, “Wells Fargo” və “Goldman Sachs” da maliyyə nəticələrini açıqlayacaq.