"Neomotors"a maliyyə sanksiyası tətbiq edilib

"Neomotors" MMC-yə qarşı rəqabət qanunvericiliyinin pozulması ilə bağlı qaldırılmış iş yekunlaşıb.

Valyuta.az xəbər verir ki, bu barədə Antiinhisar və İstehlak Bazarına Nəzarət Dövlət Agentliyinin məlumatında bildirilir.

Məlumata görə, araşdırma minik avtomobillərinin satışı zamanı bağlanılan müqavilə şərtlərində rəqabət qanunvericiliyinin pozulması əlamətləri ilə bağlı aparılıb.

Şirkətə qarşı iş Azərbaycan Respublikasının Rəqabət Məcəlləsinin 25.1.3-cü və 25.1.5-ci maddələrinin tələblərinin pozulması əlamətlərinə əsasən qaldırılıb.

Araşdırmanın nəticəsinə əsasən, "Neomotors" MMC-yə yol verdiyi haqsız rəqabət hallarının aradan qaldırılması və gələcəkdə bu cür hallara təkrar yol verməməsi barədə göstəriş verilib. Eyni zamanda, şirkətə maliyyə sanksiyası tətbiq olunub.

Sərvanə Rəmixanova