"İnsanın özünə etdiyi investisiya gələcək uğurlarının əsasını təşkil edir"

İT sahəsində karyeraya başlayan qadınlar öz bilik və bacarıqlarını davamlı inkişaf etdirməli, yeni imkanlardan maksimum yararlanmalıdırlar. 

Valyuta.az xəbər verir ki, bunu Rabitəbankın Təlim və İnkişaf üzrə rəhbəri Nərminə Sultanova "TechSHEroes IV" tədbirində çıxışı zamanı deyib.

O qeyd edib ki, bu sahədə uğur qazanmaq üçün aktiv olmaq və öyrənməkdən çəkinməmək vacibdir: "Ətrafınızda təcrübəsindən faydalana biləcəyiniz insanlardan məsləhət alın, kurslarda, tədbirlərdə və müxtəlif layihələrdə fəal iştirak edin. Bilik və ya təcrübənizin az olduğunu düşünərək özünüzü geri çəkməyin".

Nərminə Sultanova bildirib ki, müasir dövrdə informasiya əldə etmək əvvəlkindən daha asandır:

 "Hazırda süni intellekt dövründə yaşayırıq və internet vasitəsilə çox geniş bilik əldə etmək mümkündür. Mövcud imkanlardan istifadə edin, öyrənin və öyrəndiklərinizi praktikada tətbiq edin".

O vurğulayıb ki, ilk uğursuzluqlar insanı ruhdan salmamalıdır: "Bir yerdə alınmırsa, bu o demək deyil ki, başqa yerdə də alınmayacaq. Bir neçə yerə müraciət edib yalnız birindən müsbət cavab almaq tam normaldır. Ola bilər ki, bir şirkət üçün uyğun olmayasınız, amma başqa bir şirkət sizin potensialınızı qiymətləndirsin".

N.Sultanovanın sözlərinə görə, insanın özünə etdiyi investisiya gələcək uğurlarının əsasını təşkil edir: "Müəyyən bir dövr var ki, həmin vaxt özünüzü nə qədər inkişaf etdirsəniz, gələcəkdə bunun nəticəsini görəcəksiniz. Aktiv olun və "bacarmazsan", "alınmaz" kimi fikirlərə əhəmiyyət verməyin".