"Əsl güc adınızın qarşısında “Təsisçi” yazılmasında deyil”

Bahar Dadaşova
  Strateq, Mentor və Biznes idarəetməsi üzrə ekspert

Son illərdə korporativ mühitdə ən çox rastlaşdığımız tendensiya - mütəxəssislərin kütləvi şəkildə "öz işimin müdiri olacağam" şüarı ilə maaşlı karyeranı kiçiltməsidir. 

Bəs bu, həqiqətənmi inkişaf göstəricisidir, yoxsa sadəcə rəqəmsal dünyanın yaratdığı bir illüziya?

Bir peşəkar idarəçi olaraq məsələyə rəqəmlər, sistemlər və reallıqlar üzərindən baxaq.

"Sahibkar" titulunun inflyasiyası və sosial şəbəkə illüziyası 

Bu gün sosial şəbəkələr sahibkarlığı bir fəaliyyət növü kimi deyil, bir "status" və ya estetik vizual kimi satır.

İnsanlara elə gəlir ki, şirkətdən çıxıb öz VÖEN-ini (Vergi Ödəyicisinin Eyniləşdirmə Nömrəsi) açmaq dərhal azadlıq və gəlir gətirəcək. Halbuki, idarəetmə reallığı çox sərtdir. Öz biznesini qurmaq istəyən insanların 80%-i əslində sahibkar olmaq istəmir. Onlar sadəcə mövcud işlərindəki mikromenecmentdən, qeyri-peşəkar rəhbərlərdən və icraçı rolundan qaçmaq istəyirlər. Onlar azadlıq axtararkən, əksər hallarda özlərinin qurduğu sistemsiz və xaotik bir mexanizmin ən çox yorulan, 7/24 işləyən fəhləsinə çevrilirlər.

Peşəkar idarəçi və icraçı fərqi

Uğur masadakı titulla deyil, qurduğunuz sistemin miqyası ilə ölçülür.

Bir çox "kiçik biznes sahibinin" illik dövriyyəsi və təsir dairəsi, böyük bir şirkətdə çalışan peşəkar Kommersiya direktorunun idarə etdiyi aylıq büdcənin bəlkə də yüzdə birinə bərabərdir. Maaşlı bir işdə çalışmaq heç də "ikinci plan" deyil. 

Əgər siz sadəcə verilən tapşırıqları edən bir "icraçı"sınızsa, bəli, o iş sizi yoracaq. Lakin əgər siz çalışdığınız qurumda gəlirliliyi optimallaşdıran, prosesləri dizayn edən bir "Sistem arxitektoru"sunuzsa, sizin bazardakı dəyəriniz, gəliriniz və rahatlığınız bir çox sahibkardan qat-qat yüksək olur. Bu cür mütəxəssislər masada "səssiz avtoritet"ə malikdirlər; onlar şirkətə yox, şirkət onlara möhtacdır.

Gəlir və enerjinin strateji idarəedilməsi 

Maaşlı işə yuxarıdan aşağı baxanların əsas arqumenti "başqası üçün işləmək" fikridir. Reallıqda isə biznes - resursların (zaman, pul, enerji) düzgün idarə edilməsidir. Təcrübəli bir top-menecer riskləri minimuma endirərək, başqasının kapitalı üzərində böyük layihələr idarə edir, strateji qərarlar verir və bunun müqabilində yüksək divident/maaş alır. Bu, əslində ən ağıllı kommersiya gedişlərindən biridir.

Uğurlu olmaq üçün mütləq biznes qurmaq şablonu - dövrümüzün ən böyük manipulyasiyasıdır. Əsl güc, adınızın qarşısında "Təsisçi" yazılmasında deyil, olduğunuz otaqda, çalışdığınız şirkətdə yaratdığınız dəyərin və sistemin əvəzolunmazlığındadır. İstər öz biznesinizdə, istərsə də korporativ sektorda olun: Səs-küy salmadan işləyən bir sistem qura bilmirsinizsə, hər iki halda sadəcə prosesin qurbanı olacaqsınız.