Süni intellekt dövründə işə qəbul prosesi insanlara və etibara doğru dəyişir

"PageGroup" tərəfindən yayımlanan “Global Talent Trends 2026” araşdırması, süni intellektin istifadəsi artmasına baxmayaraq, işə qəbul proseslərində insan mühakiməsinin, şəffaflığın və etibarın həlledici rolunu qoruduğunu göstərir.

Valyuta.az xəbər verir ki, 36 fərqli sektordan 60 mindən çox insanın iştirakı ilə hazırlanan araşdırma, texnologiyanın prosesləri sürətləndirdiyini, lakin insan yönümlü yanaşmanın əhəmiyyətinin azalmadığını ortaya qoyur. Nəticələr işə qəbul strategiyalarını formalaşdıran üç əsas tendensiyanı ön plana çıxarır.

Rəqəmsal transformasiya artıq seçim və yerləşdirmə proseslərinin ayrılmaz hissəsidir. Namizədlərin 71 faizi iş müraciətlərində, işə qəbul menecerlərinin isə 62 faizi proseslərdə süni intellektdən istifadə edir. Buna baxmayaraq, işəgötürənlər insan ünsiyyəti, mühakimə bacarığı və unikal bacarıqlar kimi süni intellektin tam əvəz edə bilmədiyi keyfiyyətlərə daha çox önəm verirlər.

Eyni zamanda, düzgün ixtisaslı kadr tapmaq bir çox sektor üçün əsas problemlərdən biri olaraq qalır. Rəhbərlərin 39 faizi bu sahədə çətinlik yaşadığını bildirir. 27 faizlik bir qrup isə artıq təhsil və iş təcrübəsi əvəzinə birbaşa bacarıqlara üstünlük verir.

Araşdırma göstərir ki, iş dünyasında prioritetlər dəyişir. İş-yaşam balansı artıq əməkhaqqı, iş təhlükəsizliyi və karyera yüksəlişi kimi faktorları geridə qoyaraq ən vacib meyara çevrilib.

İştirakçıların 29 faizi balanslı iş həyatını əsas seçim kriteriyası kimi göstərir. Respondentlərin 90 faizi isə bunu ilk beş prioritet arasında qeyd edir. İş axtaranların 42 faizi iş dəyişdirərkən bu balansın pozulmasından narahat olur.

Araşdırmaya görə, işəgötürənlərin qısa müddətli trendlərdən çox, etibar yaradan praktiki yanaşmalara fokuslanması tövsiyə olunur. İlk əlaqə anından etibarən əməkhaqqı, gözləntilər və iş şəraiti barədə şəffaflıq göstərilməsi, ixtisaslı kadrların cəlb edilməsində əsas faktor kimi qiymətləndirilir.

Paşa Məmmədli