Hüquq texnologiyaları startapı 3,8 milyon dollar investisiya alıb

Süni intellekt dəstəkli məhkəmə işlərinin idarə edilməsi platforması olan “Turbo Law” 3,8 milyon dollar investisiya cəlb edib.

Valyuta.az xəbər verir ki, şirkətin investisiya turuna “Revo Capital” rəhbərlik edib.

Şirkətin açıqlamasına görə, cəlb olunan vəsait məhsulun inkişafının sürətləndirilməsi, komandanın genişləndirilməsi və ABŞ bazarında böyümənin dəstəklənməsi məqsədilə istifadə olunacaq.

“Turbo Law” 2025-ci ildə Cey Sarmaz (Cey Sarmaz) və Özgür Bora Gevrek tərəfindən təsis edilib. Şirkət hüquq firmaları və sığorta şirkətləri üçün nəzərdə tutulmuş süni intellekt dəstəkli məhkəmə işlərinin idarə edilməsi platforması hazırlayan hüquq texnologiyaları startapıdır.

Platforma mürəkkəb məhkəmə proseslərində istifadə olunan sənədləri, qeydləri və digər məlumatları vahid rəqəmsal mühitdə birləşdirərək hüquq komandalarının fəaliyyətinin daha səmərəli təşkilinə imkan yaradır.

“Turbo Law” məhkəmə işlərinin araşdırılması, hüquqi tədqiqatların aparılması, iddia və müdafiə sənədlərinin hazırlanması, risklərin qiymətləndirilməsi və məhkəmə strategiyalarının formalaşdırılması kimi proseslərdə süni intellektdən istifadə edir. Bu sayədə hüquqşünaslar böyük həcmdə məlumat və sənədləri daha sürətli təhlil edə, qərarvermə proseslərini daha operativ həyata keçirə bilirlər.

Xüsusilə tibbi səhlənkarlıq, sığorta mənşəli mübahisələr və mülki hüquq pozuntuları ilə bağlı məhkəmə işlərinə fokuslanan “Turbo Law” iş materiallarındakı əlaqələri və kritik məlumatları daha görünən hala gətirərək hüquq komandalarına hərtərəfli iş mühiti təqdim edir.

Şirkətin məlumatına görə, platforma indiyədək 1 800-dən çox aktiv məhkəmə işinin idarə olunmasında istifadə edilib və 5 milyondan artıq səhifə hüquqi sənədi emal edib.

“Revo Capital”ın həmtəsisçisi və baş icraçı direktoru Cenk Bayrakdar bildirib ki, süni intellekt hüquq kimi böyük həcmdə məlumatlarla işləyən sahələri köklü şəkildə dəyişdirir. Onun sözlərinə görə, “Turbo Law” məhkəmə proseslərini dərindən anlayaraq bu transformasiyanı həyata keçirdiyi üçün bazarda fərqlənir.

Mayya Hüseynova