Azərbaycanda vençur kapitalı fondları üçün yeni qaydalar müəyyənləşir

Azərbaycanda vençur kapitalı fondlarının fəaliyyəti ilə bağlı yeni tələblər müəyyən edilir. Dəyişikliklər fondların investisiya istiqamətlərini, hüquqi formasını, borclanma limitlərini və nəzarət mexanizmlərini əhatə edir.

Valyuta.az xəbər verir ki, bununla bağlı müddəalar Milli Məclisin İqtisadi siyasət, sənaye və sahibkarlıq komitəsində müzakirəyə çıxarılan “İnvestisiya fondları haqqında” qanuna dəyişiklik layihəsində əksini tapıb.

Layihəyə əsasən, vençur kapitalı fondunun nizamnaməsində və ya təsis sənədlərində fondun əsas fəaliyyət istiqaməti aydın göstərilməlidir. Fond cəlb etdiyi vəsaitin azı 70 faizini qanunda nəzərdə tutulan investisiya məqsədlərinə yönəltməlidir. Qalan vəsait isə likvidliyin idarə olunması üçün digər maliyyə alətlərinə yerləşdirilə bilər.

Vençur kapitalı fondları iki rejimdə fəaliyyət göstərə biləcək: azad hesabatlı vençur kapitalı fondu və lisenziyalaşdırılan vençur kapitalı fondu. Fondlar məhdud məsuliyyətli cəmiyyət, qapalı səhmdar cəmiyyəti, kommandit ortaqlığı və ya qapalı paylı investisiya fondu formasında yaradıla bilər.

Qanun layihəsində fondların digər sahibkarlıq fəaliyyəti ilə məşğul olması qadağan edilir. Onların əsas fəaliyyəti investorların vəsaitlərini innovativ layihələrə yönəltməkdən ibarət olacaq.

Sənədə görə, vençur kapitalı fondları rəqəmsal texnologiyaların və innovasiya məhsullarının hazırlanması, istehsalı və təkmilləşdirilməsi ilə məşğul olan mikro, kiçik və orta sahibkarlıq subyektlərinə investisiya edə biləcək. Bu kateqoriyaya “Startap” şəhadətnaməsi alan, texnologiyalar parkı, texnoloji biznes inkubatoru, sənaye və azad iqtisadi zonalarda qeydiyyatdan keçən sahibkarların layihələri də daxildir.

Fondların borc götürməsi isə onların fəaliyyət rejimindən asılı olacaq. Azad hesabatlı vençur kapitalı fondu yalnız qısamüddətli likvidlik ehtiyaclarını qarşılamaq üçün borclana bilər. Bu halda ümumi borc öhdəlikləri fondun ümumi kapital öhdəliklərinin 30 faizindən çox olmamalı, hər borcun müddəti isə 12 ayı keçməməlidir.

Lisenziyalaşdırılan vençur kapitalı fondu üçün daha sərt limit nəzərdə tutulur. Belə fond aktivlərinin 10 faizindən artıq olmayan məbləğdə və maksimum üç ay müddətinə borc götürə bilər.

Lisenziyalaşdırılan vençur kapitalı fondunun minimum nizamnamə kapitalı və kapitalın formalaşdırılması qaydalarını Azərbaycan Mərkəzi Bankı müəyyən edəcək. Fondun pay mülkiyyətçilərinin və ya səhmdarlarının reyestri isə mərkəzi depozitar tərəfindən aparılacaq.

Layihəyə əsasən, vençur kapitalı fondu ildə ən azı bir dəfə idarə etdiyi aktivlərin həcmini hesablamalıdır. Bu hesablamanın qaydaları da Azərbaycan Mərkəzi Bankı tərəfindən müəyyən ediləcək.

Fondlar investisiyalarını həm Azərbaycanda, həm də “Valyuta tənzimi haqqında” qanunun tələbləri nəzərə alınmaqla ölkədən kənarda həyata keçirə biləcəklər.

Bundan başqa, fondun fəaliyyət müddətinin uzadılması, idarəçinin dəyişdirilməsi və əvvəlki fondun fəaliyyət müddəti başa çatdıqdan sonra yeni varis vençur kapitalı fondunun yaradılması məsələləri fondun nizamnaməsi və ya investisiya bəyannaməsi ilə tənzimlənəcək.