Asim Həsənov
İnsan Resursları üzrə mütəxəssis
İş yerlərində siqaret fasilələri uzun illərdir həm işəgötürənlər, həm də işçilər arasında müzakirə olunan mövzulardan biridir. Bir tərəfdən işçilər gün ərzində qısa fasilələrə ehtiyac duyduqlarını bildirirlər, digər tərəfdən isə siqaret çəkməyən əməkdaşlar iş vaxtının bərabər bölüşdürülmədiyini düşünürlər. Son illərdə bəzi şirkətlər bu məsələyə fərqli yanaşaraq siqaret çəkməyən işçiləri əlavə üstünlüklərlə təşviq etməyə başlayıblar.
Standart bir siqaret fasiləsi təxminən 10-15 dəqiqə çəkir. Gün ərzində 4-5 dəfə siqaret fasiləsinə çıxan işçi ümumilikdə təxminən 1 saatını iş prosesindən kənarda keçirir. Bu isə ay ərzində təxminən 20 iş saatına, yəni orta hesabla 2,5 iş gününə bərabər vaxt itkisi deməkdir.
Məhz bu səbəbdən dünyanın müxtəlif ölkələrində fəaliyyət göstərən şirkətlər işçilərin sağlam həyat tərzinə marağını artırmaq və iş vaxtından daha səmərəli istifadəni təşviq etmək üçün müxtəlif motivasiya proqramları tətbiq edirlər.
Məsələn, Yaponiyanın "Piala Inc." şirkəti siqaret çəkməyən işçilərinə ildə əlavə 6 gün ödənişli məzuniyyət verir. Bu təşəbbüs nəticəsində həm işçilərin motivasiyası yüksəlib, həm də bir sıra əməkdaşlar siqaretdən imtina etmək qərarı veriblər.
Bəzi Qərb şirkətləri isə fərqli yanaşma seçərək siqaret çəkməyən əməkdaşlar üçün əlavə tibbi sığorta üstünlükləri yaradır, sağlamlıq proqramlarını maliyyələşdirir və ya idman zallarına ödənişsiz abunəlik təqdim edirlər.
Maraqlı nümunələrdən biri də Rusiyada fəaliyyət göstərən şirkətlərdən birinin vakansiya elanında yer alıb. İş elanları platformalarından birində yerləşdirilən vakansiyada qeyd olunub ki, siqaret istifadə etməyən əməkdaşlara illik əlavə 2 gün məzuniyyət verilir.
