"Meta" 10 milyard dollarlıq yeni gəlir mənbəyi yarada bilər

"Meta Platforms" ("META") iki il müddətində dəyəri 10 milyard ABŞ dollarına çata biləcək potensial razılaşma çərçivəsində hesablama gücünü "Anthropic" şirkətinə icarəyə vermək barədə danışıqlar aparır.

Valyuta.az xəbər verir ki, razılaşma baş tutacağı təqdirdə "Meta" reklam biznesindən kənarda yeni gəlir mənbəyi əldə edəcək, eyni zamanda istifadə olunmayan infrastrukturundan gəlir qazanaraq "CoreWeave" və "Nebius" kimi bulud xidmətləri göstərən şirkətlərlə rəqabət imkanlarını gücləndirəcək.

Süni intellekt texnologiyalarının sürətli inkişafı fonunda hesablama gücünə tələbatın artması bu istiqamətdə marağı daha da yüksəldib.

Məlumata görə,"Claude Code" platformasının yaradıcısı olan "Anthropic" iki il ərzində "Meta"ya aylıq ödənişlər etməyi nəzərdə tutur. IPO-ya hazırlaşan "Anthropic" bu təklifi iyun ayında irəli sürüb.

Lakin "Meta"nın hazırda hesablama gücünün satışı ilə bağlı formalaşmış biznes modelinin olmaması danışıqları mürəkkəbləşdirən əsas amillərdən biri hesab olunur. Danışıqlar hələ ilkin mərhələdədir və tərəflərin yekun razılığa gələcəyinə zəmanət yoxdur.

Qeyd edək ki, "Meta"nın baş icraçı direktoru Mark Zukerberq may ayında keçirilən səhmdarların illik toplantısında bulud hesablama biznesinə daxil olmağın "tamamilə mümkün variant" olduğunu bildirmişdi.

Onun sözlərinə görə, müxtəlif şirkətlər mütəmadi olaraq "Meta"nın süni intellekt modellərinə və istifadə olunmayan hesablama resurslarına çıxış əldə etmək üçün müraciət edirlər.

Rəfiqə Abdin