"Apple" bazar dəyərinə görə "Nvidia"nı geridə qoyub

"Apple" bazar dəyərinə görə "Nvidia"nı geridə qoyaraq yenidən dünyanın ən dəyərli şirkəti olub.

Valyuta.az xəbər verir ki, "Apple"ın bazar dəyəri təxminən 4,88 trilyon ABŞ dollarına yüksəlib. "Nvidia"nın səhmlərinin 3,5% ucuzlaşması nəticəsində şirkətin bazar dəyəri isə 4,86 trilyon ABŞ dollarına enib.

Bu dəyişiklik investorların süni intellekt bazarı ilə bağlı gözləntilərini yenidən qiymətləndirməsinin nəticəsidir. Əvvəllər "Apple" süni intellekt yarışında geridə qalan şirkət hesab olunsa da, hazırda investorlar şirkətin xidmətlər ekosistemi, sabit gəlirləri və cihaz yenilənmələrindən əldə edə biləcəyi AI gəlirlərinə daha çox inanırlar.

"BRI Wealth Management" şirkətinin investisiya şöbəsinin rəhbəri Toni Medouz bildirib ki, "Apple"ın bazar dəyərinin artımı süni intellektlə bağlı spekulyativ gözləntilərdən deyil, şirkətin gəlirlərinin davamlılığına olan etimaddan qaynaqlanır.

"Apple" son aylarda süni intellekt strategiyasını gücləndirmək istiqamətində addımlar atıb. Şirkət uzun müddət gecikən yenilənmiş "Siri" xidmətini təqdim edib və hesab edir ki, yeni funksiyalar texnologiya nəhəngləri ilə AI sahəsində fərqi azaltmağa kömək edəcək.

"Apple"ın liderliyə yüksəlməsi "Nvidia"nın mövqeyinin zəifləməsi anlamına gəlmir. Şirkət süni intellekt infrastrukturunun əsas təchizatçılarından biri olaraq qalır və bazar şəraiti dəyişərsə, yenidən dünyanın ən dəyərli şirkətinə çevrilə bilər.

Qeyd edək ki, süni intellektə yönələn investisiyalar artıq yalnız "Nvidia" ilə məhdudlaşmır. "Micron" kimi yaddaş çipi istehsalçıları və Cənubi Koreyanın "SK Hynix" şirkəti də investorların diqqətini cəlb etməyə başlayıb.

Rəfiqə Abdin