"SpaceX" 1 trilyon dollarlıq bazar dəyərini itirdi

İlon Maskın rəhbərlik etdiyi "SpaceX" şirkətinin səhmləri birjada tarixi ilkin kütləvi təklifdən (IPO) sonra ilk dəfə yerləşdirmə qiymətindən aşağı enib.

Valyuta.az xəbər verir ki, şirkətin səhmləri cümə axşamı ticarət sessiyasını 131,11 ABŞ dolları səviyyəsində başa vurub. Bu, IPO zamanı müəyyən edilmiş 135 dollarlıq qiymətdən aşağı ilk bağlanış olub.

Şirkətin səhmləri iyunun 16-da qeydə alınan zirvə səviyyəsindən bəri təxminən 1 trilyon ABŞ dolları bazar dəyəri itirib. IPO günü ilə müqayisədə isə bazar kapitalizasiyasında azalma təxminən 320 milyard dollar təşkil edir.

Səhmlərin ucuzlaşmasına səbəblərdən biri "SpaceX"in bu həftə həyata keçirməyi planlaşdırdığı ilk "Starship" buraxılışını təxirə salması olub. Şirkətin Cənubi Texasdakı "Starbase" kosmodromundan baş tutmalı olan buraxılış mühərriklərdən bir neçəsinin işə düşməməsi səbəbindən avtomatik olaraq dayandırılıb.

Şirkətin baş icraçı direktoru İlon Mask "X" sosial şəbəkəsində bildirib ki, növbəti buraxılışın gələn həftənin əvvəlində həyata keçirilməsi planlaşdırılır.

Qeyd edək ki, "SpaceX" iyunun 12-də keçirilən IPO zamanı 85 milyard dollardan çox vəsait cəlb edib. Bu, tarixdə ən böyük ilkin kütləvi təkliflərdən biri hesab olunur.

Analitiklərin fikrincə, səhmlərə təzyiq göstərən digər amil isə yaxın aylarda qüvvəyə minəcək satış məhdudiyyətlərinin aradan qaldırılmasıdır. Belə ki, şirkətin ilk rüblük maliyyə hesabatından sonra, avqust ayında əməkdaşlar və erkən investorlar ümumilikdə 911,5 milyon səhmi satışa çıxara biləcəklər. Bu da bazarda əlavə satış təzyiqi yarada bilər.

"Starship" raketi "SpaceX"in gələcək strategiyasında mühüm yer tutur. Tam təkrar istifadə oluna bilən raketin yeni nəsil "Starlink" peyklərini orbitə çıxarması, həmçinin "NASA"nın "Artemis" proqramı çərçivəsində astronavtların Ay səthinə endirilməsi üçün modifikasiya edilmiş versiyasının istifadə olunması nəzərdə tutulur.

Sərvanə Rəmixanova