"Coca-Cola"nın törəməsi istehsalı dayandırdı

ABŞ-ın içki istehsalçısı "Coca-Cola" şirkətinin süd məhsulları istehsal edən törəmə müəssisəsi "Fairlife" kiber hücumuna məruz qalıb.

Valyuta.az xarici KİV-ə istinadən xəbər verir ki, şirkət bu barədə ABŞ Qiymətli Kağızlar və Birja Komissiyasına (SEC) təqdim etdiyi açıqlamada məlumat verib.

Bildirilib ki, kiberhücum nəticəsində "Fairlife"ın ABŞ-dəki istehsal sistemləri zərər görüb və istehsal fəaliyyəti müvəqqəti olaraq dayandırılıb. Şirkət sistemlərin nə vaxt tam bərpa ediləcəyi ilə bağlı hələlik tarix açıqlamayıb.

Qeyd edək ki, Kanadadakı "Fairlife" müəssisələrinin fəaliyyəti hücumdan təsirlənməyib və normal qaydada davam edir.

"Coca-Cola" dünyanın ən iri içki istehsalçılarından biri hesab olunur. Şirkətin su, qazlı içkilər və süd məhsulları daxil olmaqla geniş məhsul portfeli var. Onun əsas brendlərindən biri olan "Fairlife"ın 2024-cü ildə satışlarının təxminən 4 milyard dollara çatdığı bildirilir.

Mütəxəssislərin sözlərinə görə, qida və içki sənayesinə qarşı həyata keçirilən kiber hücumları uzunmüddətli istehsal problemlərinə səbəb ola bilir. Daha əvvəl "Arizona Beverages" və qida distribütoru UNFI də oxşar hücumlarla üzləşmiş, nəticədə istehsal həftələrlə dayanmış və bəzi mağazalarda məhsul qıtlığı yaranıb.

Sərvanə Rəmixanova