Sosial mediadakı məzmunun nə qədəri süni intellekt tərəfindən yaradılır?

Süni intellektin sürətlə inkişafı internetdə paylaşılan məzmunun orijinallığı ilə bağlı müzakirələri daha da aktuallaşdırıb. 

Valyuta.az xəbər verir ki, süni intellekt mətnlərinin aşkarlanması sahəsində fəaliyyət göstərən "Pangram" şirkətinin hazırladığı yeni hesabat müxtəlif platformalarda paylaşılan məzmunun nə qədərinin süni intellekt vasitəsilə yaradıldığını ortaya qoyur.

Şirkətin brauzer əlavəsi vasitəsilə toplanan məlumatlara əsasən, peşəkar şəbəkə olan "LinkedIn" süni intellektlə hazırlanmış məzmunun ən çox yayıldığı platformalardan biridir.

Araşdırmaya görə, "LinkedIn" platformasında paylaşılmış uzun mətnlərin 41 faizi birbaşa süni intellekt alətlərinin köməyi ilə hazırlanıb. Qısa paylaşımlarda isə bu göstərici 30 faiz təşkil edir.

Hesabatda "Medium" platforması da sosial media platforması kimi qiymətləndirilib. Burada yayımlanan uzun məqalələrin 31 faizində süni intellektdən istifadə edildiyi müəyyən olunub.

Araşdırmaya əsasən, X platformasında uzun mətnlərin 29 faizi tam şəkildə süni intellekt tərəfindən hazırlanıb. Lakin insan və süni intellekt əməkdaşlığı nəticəsində yaranan hibrid məzmun da nəzərə alındıqda, X platformasında süni intellektdən istifadə səviyyəsinin "LinkedIn"dən də yüksək olduğu bildirilir.

Məlumatlara görə, X platformasında dərc olunan uzun mətnlərin cəmi 53,2 faizi tamamilə insanlar tərəfindən yazılıb. Qısa paylaşımlarda isə süni intellektdən istifadə nisbəti 9 faiz səviyyəsindədir.

"Reddit" platformasında göstəricilər daha aşağıdır. Burada uzun paylaşımların 13 faizi, qısa mətnlərin isə 3 faizi süni intellekt vasitəsilə hazırlanıb.

"Substack" platformasında uzun mətnlərin 10 faizi, qısa paylaşımların isə 12 faizi süni intellektin köməyi ilə yaradılıb.

Mütəxəssislərin fikrincə, xüsusilə peşəkar əlaqələr və karyera inkişafı üçün istifadə olunan "LinkedIn" kimi platformalarda orijinal məzmunun getdikcə azalması gələcəkdə internetdə yayımlanan məlumatların etibarlılığı və keyfiyyəti ilə bağlı mühüm suallar yaradır.

Paşa Məmmədli