"SpaceX" səhmlərinə 1000 dollar yatıran investorlar nə qədər qazandı?

"SpaceX" şirkəti ilkin kütləvi səhm təklifi (IPO) çərçivəsində təxminən 75 milyard dollar cəlb edib. Bu, fond bazarı tarixində ən böyük IPO hesab olunur və şirkətin təsisçisi İlon Maskın sərvətinin ilk dəfə 1 trilyon dolları keçməsinə imkan verib.

Qaynarinfo xəbər verir ki, "Finbold"un yazdığına görə, 11 iyun 2026-cı ildə IPO zamanı hər səhm üçün 135 dollar qiymətlə "SpaceX" səhmlərini alan investorlar, şirkətin birjaya çıxmasından sonra qiymətlərdə yüksək dəyişkənliyə baxmayaraq, bir ay sonra da mənfəətdə qalırlar.

Belə ki, IPO qiyməti ilə yatırılmış 1000 dollarlıq investisiyanın bugünkü dəyəri təxminən 1076 dollar olardı. Bu, ticarət sessiyasının bağlanış qiyməti olan 145,30 dollar əsasında hesablandıqda təxminən 7,6 faiz gəlirlilik deməkdir.

IPO zamanı "SpaceX"in bazar dəyəri təxminən 1,77 trilyon dollar qiymətləndirilirdi. İnvestorların yüksək marağı nəticəsində səhmlər ilk ticarət günündə təxminən 150 dollardan açılıb və sessiyanı 161 dollar ətrafında başa vurub. Bunun sayəsində şirkətin bazar kapitallaşması dərhal 2 trilyon dollar həddini keçib.

Artım sonrakı sessiyalarda da davam edib və səhmlərin qiyməti gün ərzində 225 dollara qədər yüksəlib. Lakin daha sonra bazarın ümumi zəifləməsi və investorların mənfəəti rəsmiləşdirməsi səbəbindən qiymətlər geriləyib. Buna baxmayaraq, səhmlər hələ də IPO qiymətindən yuxarı ticarət olunur və bu da erkən investorların mənfəətdə qalmasına imkan verir.

Bununla yanaşı, investisiyanın nəticəsi səhmlərin hansı vaxtda alınmasından əhəmiyyətli dərəcədə asılıdır. Əgər investor səhmləri ilk ticarət gününün bağlanış qiyməti ilə – təxminən 161 dollardan alıbsa, onun yatırdığı 1000 dolların bugünkü dəyəri təxminən 902 dollar təşkil edərdi. Beləliklə, həmin müddətdə investisiyanın dəyəri təxminən 10 faiz azalıb.

İnvestorların "SpaceX"ə marağını bir neçə amil dəstəkləyir. Şirkət "Falcon" raket proqramı sayəsində kommersiya kosmik buraxılışları bazarında lider mövqeyini qoruyur. Eyni zamanda, əsas gəlir mənbələrindən birinə çevrilmiş "Starlink" peyk interneti biznesini genişləndirir.

İnvestorlar həmçinin buraxılış xərclərini əhəmiyyətli dərəcədə azaltmalı və gələcəkdə Ay və Mars missiyalarını təmin etməli olan tam təkrar istifadə edilə bilən "Starship" kosmik gəmisinin hazırlanmasını diqqətlə izləyirlər.

Bundan əlavə, süni intellekt infrastrukturu sahəsində mümkün layihələr də şirkətin gələcək inkişafı ilə bağlı gözləntiləri artırır.

Mayın 22-də İlon Maskın aerokosmik şirkəti ilkin kütləvi səhm təklifinin keçirilməsi üçün rəsmi sənədləri təqdim edib və investorlara Yer hüdudlarından kənar iqtisadiyyatın yaradılması ilə bağlı geniş strategiyasını açıqlayıb.

Şirkətin birjaya çıxmasından sonra bəzi investorlar əhəmiyyətli gəlir əldə ediblər. Belə ki, on ildən çox əvvəl "SpaceX"də işləməyə başlayan və o zaman şirkət haqqında demək olar ki, heç nə bilməyən adi bir qaynaqçı milyonçuya çevrilib.

Bundan başqa, Avstraliyanın ən varlı qadını, mədən sənayesi maqnatı Cina Raynhart özünün "Hancock Prospecting" şirkəti vasitəsilə "SpaceX"ə 1 milyard dollardan çox sərmayə yatırıb.

Lakin iyunun 24-də "SpaceX" və "Tesla" səhmlərinin kəskin ucuzlaşmasından sonra İlon Maskın sərvətinin yenidən 1 trilyon dollardan aşağı düşdüyü məlum olub.

Paşa Məmmədli