"SpaceX" üçün milyardlarla dollarlıq passiv səhm alışı gözlənilir

"SpaceX"in "Nasdaq 100" indeksinə daxil edilməsi milyardlarla dollar həcmində passiv səhm alışına səbəb ola bilər.

Valyuta.az xəbər verir ki, bu fonda aparıcı broker şirkətləri bazar dəyəri 2 trilyon dolları ötən raket və peyk şirkəti üzrə analitik əhatəyə başlayaraq ümumilikdə müsbət qiymətləndirmələr açıqlayıblar.

Şirkət IPO-dan cəmi 15 gün sonra "Nasdaq 100" indeksinə daxil olur. Bu, "Nasdaq"ın yeni qaydaları sayəsində tarixdə ən sürətli indeks daxilolmalarından biri hesab edilir.

Hazırda "Nasdaq 100" indeksini izləyən fondlarda 587 milyard dollardan çox vəsait idarə olunur. Buna görə də indeks fondları və ETF-lər, o cümlədən "Invesco QQQ" və "QQQM", portfellərinə "SpaceX" səhmlərini əlavə etməli olacaqlar. "J.P. Morgan" bu proses nəticəsində təxminən 4,3 milyard dollar həcmində passiv investisiya axını proqnozlaşdırır.

Eyni zamanda, IPO-nu təşkil edən banklar üçün tətbiq olunan "sakitlik dövrü" başa çatıb və aparıcı brokerlər şirkət üzrə ilk analitik qiymətləndirmələrini açıqlayıblar. "Morgan Stanley", "Goldman Sachs", "RBC", "Bernstein" və "Stifel" "SpaceX" səhmlərinə ən yüksək reytinq verərək, xüsusilə "Starship" raketi, "Starlink" peyk şəbəkəsi və süni intellekt sahəsindəki potensialını ön plana çıxarıblar.

Bununla yanaşı, bütün analitiklər eyni mövqedə deyil. "Morningstar" şirkətin bazar dəyərini təxminən 780 milyard dollar qiymətləndirərək, süni intellekt layihələri və "X" platforması ilə bağlı qeyri-müəyyənliklərin risk yaratdığını bildirib.

Qeyd edək ki, hazırda bazar kapitallaşması 2,1 trilyon dollar olan "SpaceX" ABŞ-ın altıncı ən dəyərli şirkətidir. Şirkətin səhmləri isə birjada ilk ticarətə çıxmasından sonra baş verən dalğalanmalara baxmayaraq 6%-dən çox bahalaşıb.

Rəfiqə Abdin