"Bitcoin" mədənçiliyi şirkəti "Anthropic" ilə 20 illik müqavilə bağladı

Süni intellekt sahəsində fəaliyyət göstərən "Claude" modelinin yaradıcısı "Anthropic" şirkəti "Bitcoin" mədənçiliyi ilə məşğul olan "TeraWulf" ilə uzunmüddətli əməkdaşlığa başlayıb.

Valyuta.az xəbər verir ki, tərəflər arasında 20 illik enerji icarəsi müqaviləsi imzalanıb. Müqaviləyə əsasən, "Anthropic" ABŞ-ın Kentukki ştatında yerləşən və "TeraWulf"a məxsus məlumat mərkəzindən (data center) istifadə edəcək.

Məlumata görə, bu müqavilə "TeraWulf"a qısamüddətli perspektivdə təxminən 19 milyard ABŞ dolları həcmində gəlir qazandıracaq.

Xəbərin açıqlanmasından sonra şirkətin səhmləri birjaöncəsi ticarətdə 16%-dən çox bahalaşıb.

Qeyd edək ki, "TeraWulf" ötən ildən etibarən fəaliyyət istiqamətini mərhələli şəkildə süni intellekt infrastrukturu sahəsinə yönəldib. Şirkət daha əvvəl "Fluidstack" ilə əməkdaşlığa başlamış, həmin layihəyə "Google" zəmanət vermiş və sonradan "TeraWulf"un səhmlərinin bir hissəsini satın alıb.

Bu əməkdaşlıqlar nəticəsində "TeraWulf"un səhmləri ötən ildən bəri 80%-dən çox dəyər qazanıb.

Bundan əlavə, "TeraWulf" 168 meqavat gücündə olan digər məlumat mərkəzinin enerji tutumunun 50%-ni də yenidən Fluidstack şirkətinə ayırıb.

Əvvəllər əsasən nüvə enerjisi hesabına "Bitcoin" mədənçiliyi ilə tanınan "TeraWulf" son bir ildə fəaliyyətini genişləndirərək süni intellekt şirkətləri üçün enerji və məlumat mərkəzi infrastrukturu təminatçısına çevrilmək istiqamətində addımlar atır.

Sərvanə Rəmixanova