"Samsung"un mənfəəti 19 dəfə artsa da, səhmləri ucuzlaşıb

Dünyanın ən böyük yaddaş çipi istehsalçısı olan “Samsung Electronics” 2026-cı ilin ikinci rübündə əməliyyat mənfəətinin ötən ilin eyni dövrü ilə müqayisədə 19 dəfə artdığını açıqlayıb. Buna baxmayaraq, süni intellekt bumunun davamlılığı ilə bağlı narahatlıqlar fonunda şirkətin səhmləri dəyər itirib.

Valyuta.az xəbər verir ki, şirkətin tənzimləyici quruma təqdim etdiyi hesabata əsasən, aprel-iyun aylarında əməliyyat mənfəəti 89,4 trilyon von (58,44 milyard dollar) təşkil edib. Bu göstərici bazarın 87,3 trilyon vonluq proqnozunu üstələyib. 

Qeyd edək ki, ötən ilin eyni dövründə şirkətin əməliyyat mənfəəti 4,7 trilyon von olub.

Eyni zamanda, "Samsung"un gəlirlərinin illik müqayisədə 129% artaraq 171 trilyon vona çatacağı gözlənilir.

Buna baxmayaraq, səhər ticarət sessiyasında şirkətin səhmləri 7,9%-ə qədər ucuzlaşıb. Onun əsas rəqibi “SK Hynix”in səhmləri də 7,3% geriləyib və bu, Cənubi Koreyanın əsas KOSPI indeksinin 6% enməsinə səbəb olub.

İnvestorlar rekord mənfəət gözləntilərinin artıq qiymətlərdə əks olunması və süni intellekt məlumat mərkəzlərinin istifadəyə verilməsinin ləngiyə biləcəyi ehtimalı səbəbindən satışa üstünlük veriblər.

Qlobal süni intellekt bumunun təsiri ilə həm "Samsung Electronics", həm də "SK Hynix" artıq bir trilyon dollarlıq bazar dəyərinə malik şirkətlər sırasına daxil olub. Bu dövrdə yaddaş çiplərinin qiymətləri artmağa davam edib və yüksək tələbat yalnız HBM çiplərini deyil, ənənəvi DRAM və NAND məhsullarını da əhatə edib.

Həmçinin bazar ekspertləri istehsal güclərinin məhdud artımı və yüksək tələbat səbəbindən yaddaş çipləri bazarında qıtlığın bu il və gələn il də davam edəcəyini proqnozlaşdırırlar.

Rəfiqə Abdin