Şirkət 1 milyard dollar dəyərləndirmə ilə 150 milyon dollar investisiya aldı

Ağıllı eynək texnologiyaları hazırlayan “Even Realities” şirkəti 150 milyon dollar investisiya cəlb edib. Şirkətin B seriyasından əvvəlki 150 milyon dollarlıq investisiya raunduna “Meituan” liderlik edib. İnvestisiya raundunda “Tencent” də iştirak edib.

Valyuta.az xəbər verir ki, 2023-cü ildə təsis olunan Çində fəaliyyət göstərən şirkətin dəyərləndirməsi bu investisiyadan sonra 1 milyard dollara yüksəlib.

Şirkət bildirib ki, cəlb olunan investisiya ağıllı eynəklər üçün optik ekran texnologiyasının təkmilləşdirilməsinə, istehsal gücünün artırılmasına və qlobal bazarda böyümənin sürətləndirilməsinə yönəldiləcək.

“Even Realities” Vil Vanq (Wil Wang) tərəfindən təsis edilib. Şirkət istifadəçilərin rəqəmsal məlumatları birbaşa görmə sahəsində əks etdirməsinə imkan verən ekran texnologiyaları hazırlayır. Bunun sayəsində istifadəçilər telefona baxmadan məlumatları eynəyin görmə sahəsinə inteqrasiya olunmuş formada əldə edə bilirlər.

Şirkətin məhsulları kamera əsaslı yanaşmaya deyil, məxfiliyin qorunmasına üstünlük verən konsepsiyaya əsaslanır. Qurğular real vaxt rejimində tərcümə, danışığın xülasələnməsi və süni intellekt dəstəkli köməkçi funksiyaları vasitəsilə istifadəçilərə operativ məlumat təqdim edir. Bu imkanlar xüsusilə peşəkar istifadə və iş mühitində ön plana çıxır.

“Even Realities” eyni zamanda ağıllı eynəkləri dəstəkləyən proqram təminatı və aksesuarlar da hazırlayır. Məsələn, ağıllı üzük kimi idarəetmə qurğuları vasitəsilə eynəklərin idarə olunmasını təmin edir. Şirkətin məqsədi smartfonu əvəz etmək deyil, məlumatı birbaşa istifadəçinin görmə sahəsinə çatdıran yeni nəsil fərdi kompüter təcrübəsi təqdim etməkdir.

Mayya Hüseynova