İpoteka kreditləşməsi bir ildə 303,6 milyon manat artıb

2026-cı il mayın 31-nə Azərbaycanda bank sektorunun kredit portfeli 30 milyard 885,8 milyon manata çatıb. Kredit portfelinin strukturunda biznes, istehlak və ipoteka kreditləri üzrə illik artım qeydə alınıb.

Valyuta.az xəbər verir ki, hesabat dövründə biznes kreditlərinin həcmi 16 milyard 401,7 milyon manat təşkil edib.

Bu göstərici 2025-ci ilin mayın 31-i ilə müqayisədə 1 milyard 301,7 milyon manat və ya 8,62% artıb. Bununla da biznes kreditləri bankların ümumi kredit portfelində ən böyük paya malik seqment olaraq qalmaqdadır.

İstehlak kreditləri isə illik müqayisədə daha yüksək artım nümayiş etdirib. Belə ki, mayın sonuna istehlak kreditlərinin həcmi 9 milyard 775,9 milyon manata yüksəlib. Bu, ötən ilin eyni dövrü ilə müqayisədə 894 milyon manat və ya 10,06% çoxdur.

İpoteka kreditləşməsi də artım tendensiyasını davam etdirib. 2026-cı il mayın 31-nə ipoteka kreditlərinin həcmi 4 milyard 708,2 milyon manat olub. Bu göstərici ötən ilin analoji dövrü ilə müqayisədə 303,6 milyon manat və ya 6,89% artım deməkdir.

Mayya Hüseynova