Böyük Britaniya süni intellekt modellərinin tənzimlənməsini nəzərdən keçirə bilər

Böyük Britaniya istehlakçıların maliyyə qərarlarına təsiri artan ümumi təyinatlı süni intellekt modellərinin tənzimlənməsi imkanını qiymətləndirə bilər.

Valyuta.az xəbər verir ki, bunu Böyük Britaniyanın Maliyyə Davranışına Nəzarət İdarəsinin (FCA) icraçı direktoru Şeldon Mills bildirib.

Onun sözlərinə görə, "ChatGPT", "Claude" və "Gemini" kimi dil modellərindən maliyyə məsləhəti almaq üçün istifadə sürətlə artır. Araşdırmaya əsasən, Böyük Britaniyada istehlakçıların dörddə birindən çoxu bu alətlərə etibar edir. Lakin onların müəyyən hissəsi bu xidmətlərin tənzimlənən maliyyə xidmətlərinə tətbiq olunan hüquqi müdafiə mexanizmlərinə daxil olmadığını bilmir.

Mills hesab edir ki, FCA qarşıdakı 3-6 ay ərzində mövcud tənzimləmə çərçivəsindən kənarda qalan ümumi təyinatlı süni intellekt modellərinin miqyasını, təsirini və yaratdığı riskləri qiymətləndirərək tənzimləmə sərhədlərinin genişləndirilməsini nəzərdən keçirməlidir.

FCA-nın sədri Eşli Alder isə bildirib ki, qurum sürətlə dəyişən texnoloji mühitə uyğunlaşaraq süni intellekt sahəsində prinsiplərə əsaslanan və nəticəyönümlü yanaşmanı davam etdirəcək.

Həmçinin vurğulanır ki, maliyyə sektorunda şirkətlərin məhdud sayda texnologiya və bulud xidmətləri təminatçılarından asılılığının artması sistem üzrə yeni risklər yarada bilər. Eyni süni intellekt modelləri və texnoloji infrastrukturdan geniş istifadə bazar iştirakçılarının oxşar qərarlar verməsinə və mümkün ümumi uğursuzluq nöqtələrinin formalaşmasına səbəb ola bilər.

Qeyd edək ki, son sorğunun nəticələrinə görə, dünya üzrə maliyyə şirkətlərinin 81 faizi müəyyən səviyyədə süni intellektdən istifadə edir, 40 faizi isə bu texnologiyanı genişmiqyaslı şəkildə biznes proseslərinə inteqrasiya edib. Hazırda süni intellekt əsasən arxa ofis funksiyalarında tətbiq olunsa da, maliyyə şirkətləri onu şikayətlərin idarə olunması və investisiya üzrə tövsiyələrin verilməsi kimi müştəri ilə birbaşa əlaqəli sahələrdə də daha geniş istifadə etməyə başlayıblar.

Rəfiqə Abdin