ABB süni intellekt əsaslı Fərdi Maliyyə Menecerini istifadəyə verib

ABB mobil tətbiqində süni intellekt əsaslı Fərdi Maliyyə Meneceri xidmətini istifadəyə verib.

Valyuta.Az banka istinadla xəbər verir ki, yenilik ABB mobile tətbiqində fəaliyyət göstərən "AI-nur" və "AI-khan" süni intellekt köməkçilərinin funksiyalarını genişləndirir.

İstifadəçilər səsli və ya yazılı sorğular vasitəsilə gəlir və xərclərini təhlil edə, müxtəlif dövrlər üzrə maliyyə göstəricilərini müqayisə edə və şəxsi büdcələri ilə bağlı məlumat əldə edə biləcəklər.

Yeni funksiya müştərilərin əməliyyat tarixçəsi əsasında gəlir və xərclərin kateqoriyalar üzrə təhlilini aparır, məlumatları vizuallaşdırılmış formada təqdim edir və müxtəlif dövrlər üzrə müqayisələr etməyə imkan yaradır.

Bununla yanaşı, "AI-nur" və "AI-khan" vasitəsilə mobil rabitə ödənişlərinin həyata keçirilməsi, ABB və digər bank kartlarına köçürmələr, kartlar və hesablar arasında vəsait köçürülməsi, mobil nömrə ilə pul göndərilməsi, kartın bloklanması və yenidən aktivləşdirilməsi kimi əməliyyatları səsli komanda ilə yerinə yetirmək mümkündür.

Bankın məlumatına əsasən, istifadəçilər Visa kartları üzrə müxtəlif xidmətlərə abunəliklərin aktivləşdirilməsi və ləğv edilməsi əməliyyatlarını da süni intellekt köməkçiləri vasitəsilə icra edə bilərlər.

ABB bildirir ki, "AI-nur" və "AI-khan" ilə indiyədək 4 milyondan çox qarşılıqlı ünsiyyət qeydə alınıb.