Banklar "myGov" vasitəsilə vətəndaşların məşğulluq məlumatlarını niyə sorğulayır?

Son dövrlər bir sıra vətəndaşlar "myGov" sistemində müxtəlif banklar tərəfindən məşğulluq məlumatlarına sorğu edilməsi ilə bağlı bildiriş aldıqlarını bildirirlər. Onların bir qismi qeyd edir ki, həmin banklarda aktiv hesabı, kartı və ya digər bank məhsulu yoxdur, bəziləri isə uzun müddətdir bankın xidmətlərindən istifadə etmədiklərini və ya ümumiyyətlə, müştərisi olmadıqlarını deyirlər. Bu hal vətəndaşlarda şəxsi məlumatlara hansı hüquqi əsasla çıxış əldə edilməsi ilə bağlı suallar yaradır.

Bankda aktiv hesabı, kartı və digər məhsulu olmayan şəxslərin məşğulluq məlumatları hansı hüquqi əsasla sorğulana bilər?

Vəkil Elyar Həsənov Valyuta.az-a bildirib ki, hər kəs üçün açıq olan məlumatlarla yanaşı, xüsusi rejimə malik məlumatlar da mövcuddur:

“Xüsusi rejimə malik, yəni qapalı və ya məhdud məlumat hesab olunur və onların bu və ya digər şəxslərə açıqlanması qanunvericiliklə müəyyən edilmiş qaydalar əsasında həyata keçirilir. Bu kateqoriyaya fərdi məlumatlar, kommersiya sirri, bank sirri, şəxsi və ailə məlumatları daxildir. Belə məlumatlar yalnız qanunla nəzərdə tutulmuş hallarda və qaydada açıqlana bilər. Təəssüf ki, bu sahə Azərbaycanda hələ də inkişaf mərhələsindədir. Bu istiqamətdə yüksək inkişaf səviyyəsinə çatılmasa da, illər keçdikcə məlumatların məxfilik rejiminə riayət olunması ilə bağlı yanaşma və vərdişlər tədricən formalaşır və yaxşılaşır. Hesab edirəm ki, şəxsin razılığı olmadan onun gəlirləri barədə məlumatların banklar və ya digər maliyyə, eləcə də digər təşkilatlar tərəfindən sorğu edilərək əldə olunması qanunvericiliyin tələblərinə ziddir”.

E.Həsənov vurğulayıb ki, burada bir məqamı da nəzərə almaq lazımdır: “Vətəndaşlar çox vaxt fərqinə varmadan və ya sənədlərlə kifayət qədər diqqətlə tanış olmadan hər hansı maliyyə əməliyyatı həyata keçirərkən bu cür məlumatların maliyyə təşkilatı tərəfindən sorğu edilməsinə razılıq verən sənədləri imzalayırlar. Məsələn, vətəndaş müraciət edərək bildirir ki, hansısa bank onun gəlirləri barədə məlumatları elektron hökumət sistemi vasitəsilə əldə edib və o, bundan narazıdır. Araşdırma zamanı isə məlum olur ki, həmin şəxs bir və ya bir neçə il əvvəl bankın xidmətindən istifadə edərkən bankın onun maliyyə məlumatlarını sorğu etməsinə razılıq verən sənədi imzalayıb. Belə olduğu halda, bank həmin razılığa əsaslandığı üçün sonradan bununla bağlı hüquqi mübahisə yaratmaq və ya etiraz etmək əksər hallarda mümkün olmur”.

Mayya Hüseynova