8 dostun hazırladığı kart oyunu necə milyonlarla dollarlıq biznes oldu?

Bəzən uğurlu biznes ideyası mürəkkəb texnologiyaya və ya böyük investisiyaya deyil, fərqli düşüncə tərzinə əsaslanır. Bunun ən maraqlı nümunələrindən biri dünyanın ən məşhur kart oyunlarından sayılan "Cards Against Humanity" layihəsidir.

Valyuta.az xəbər verir ki, layihə 2008-ci ildə ABŞ-da bir qrup məktəb dostu - Maks Temkin (Max Temkin), Coş Dillon (Josh Dillon), Daniel Dranov (Daniel Dranove), Eli Halpern (Eli Halpern), Ben Hantut (Ben Hantoot), Devid Mank (David Munk), Devid Pinsof (David Pinsof) və Eliot Vaynşteyn (Elliot Weinstein) tərəfindən hazırlanıb.

Oyunun ilk versiyası kommersiya məqsədi daşımırdı. Müəlliflər onu internetdə pulsuz PDF formatında yayımladılar və istifadəçilərə kartları özləri çap edib oynamağı təklif etdilər. Bu yanaşma oyunun qısa müddətdə geniş auditoriyaya çatmasına imkan verdi.

Layihə kifayət qədər maraq topladıqdan sonra yaradıcılar 2010-cu ildə oyunun çap versiyasını maliyyələşdirmək üçün "Kickstarter" platformasında kampaniyaya başladılar. Kampaniyanın ilkin məqsədi 4 min ABŞ dolları toplamaq idi. Lakin layihə gözləniləndən daha böyük maraq gördü və hədəfi bir neçə dəfə üstələyərək uğurla maliyyələşdirildi.

Bundan sonra "Cards Against Humanity" sürətlə populyarlaşdı və uzun müddət "Amazon" platformasında ən çox satılan stolüstü kart oyunlarından biri oldu. Şirkət illər ərzində milyonlarla oyun dəsti sataraq əyləncə sənayesində tanınmış brendlərdən birinə çevrildi.

Layihənin diqqət çəkən tərəflərindən biri isə qeyri-adi marketinq kampaniyaları olub. 2015-ci ilin "Black Friday" endirimləri zamanı şirkət ənənəvi endirimlər əvəzinə istifadəçilərə tamamilə fərqli təklif təqdim etdi. Rəsmi internet saytında insanlardan heç bir məhsul və ya xidmət təqdim etmədən sadəcə 5 ABŞ dolları göndərmələri istənildi.

Gözlənilməz nəticə əldə olundu. Təxminən 11 min nəfər bu çağırışa qoşularaq 5 dollar ödədi, minə yaxın istifadəçi isə bundan daha yüksək məbləğ göndərdi. Nəticədə şirkət bir gün ərzində 71 min ABŞ dollarından çox vəsait topladı.

Sonradan şirkət həmin vəsaiti əməkdaşları arasında bölüşdürdüyünü açıqladı. Bu kampaniya sosial şəbəkələrdə və beynəlxalq mediada geniş müzakirə olundu və "Cards Against Humanity"nin ən uğurlu viral marketinq nümunələrindən biri kimi qiymətləndirildi.

Bu hekayə göstərir ki, uğurlu biznes modeli bəzən məhsulun özündən daha çox onun təqdimat üsulundan asılı olur. "Cards Against Humanity" əvvəlcə insanlara pulsuz dəyər təqdim etdi, daha sonra isə fərqli marketinq yanaşmaları ilə öz ətrafında güclü icma formalaşdıraraq kiçik bir ideyanı qlobal biznesə çevirməyi bacardı.

Mayya Hüseynova