Fidelity: Kriptovalyutalarda yeni yüksəliş dalğasının başlayacağına heç kim zəmanət verə bilməz

Dünyanın ən böyük aktiv idarəetmə şirkətlərindən biri olan "Fidelity" kriptovalyuta bazarı ilə bağlı yeni təhlil yayımlayıb. 

Valyuta.az xəbər verir ki, şirkət analitikləri indiyədək "boğa" (yüksəliş) bazarını formalaşdıran əsas amilləri sadalasa da, onların eyni vaxtda baş verməsinin belə yeni yüksəliş dövrünə zəmanət vermədiyini bildiriblər.

İdarəçiliyində 5 trilyon dollardan çox aktiv olan "Fidelity"nin hesabatına görə, indiyədək kriptovalyuta bazarında yüksəlişi əsasən beş amil dəstəkləyib.

Bunlar "Bitcoin"in dördillik dövrü, kriptovalyuta dostu tənzimləmələr, ABŞ Mərkəzi Bankının (Fed) faiz endirimləri, yeni istifadə sahələrinin yaranması və institusional investorların bazara daxil olmasıdır.

Bununla belə, analitiklər qeyd edirlər ki, bu amillərin hər biri ayrı-ayrılıqda və ya eyni vaxtda reallaşsa belə, bazarda mütləq yeni yüksəliş mövsümünün başlayacağını söyləmək mümkün deyil.

Hesabatda vurğulanır ki, kriptovalyutaya investisiya qoymaq istəyən şəxslər bazardakı yüksək qeyri-müəyyənliyi də nəzərə almalıdırlar.

"Mövcud bazarın nə vaxt başa çatacağını, hətta ümumiyyətlə başa çatıb-çatmayacağını heç kim bilmir. Sadalanan amillər bazara təsir göstərə bilsə də, onların hansı nəticə verəcəyini proqnozlaşdırmaq mümkün deyil. Bu amillər yeni yüksəliş dövrünə səbəb ola bilər, lakin eyni zamanda heç bir ciddi artımın yaşanmadığı bir ssenari də mümkündür. Qarşıdakı dövrün necə olacağını heç kim dəqiq deyə bilməz",-  deyə "Fidelity" analitikləri bildiriblər.

Sərvanə Rəmixanova