Oyun şirkətinin CEO-su 35 milyard dollarlıq mükafat paketindən niyə imtina etdi?

“GameStop”un milyarder baş icraçı direktoru Rayan Koen (Ryan Cohen) şirkətin potensial nəticəyönümlü mükafat paketini qəbul etməyəcək və “eBay”in satın alınması ilə bağlı təklifinə dair daha ətraflı məlumatı yaxın günlərdə açıqlamağı planlaşdırır. 

Valyuta.az xəbər verir ki, bu barədə şirkət məlumat yayıb.

“GameStop” bu ilin yanvarında dəyəri təxminən 35 milyard ABŞ dolları olan kompensasiya paketini açıqladı. Paket şirkətin uğurlu dönüş həyata keçirməsi şərti ilə nəzərdə tutulmuşdu. Bunun üçün Koen “GameStop”un bazar dəyərini 10 dəfədən çox artırmalı, eyni zamanda şirkətin mənfəətini əhəmiyyətli dərəcədə yüksəltməli idi.

May ayında Koen “eBay”i nağd və səhm qarşılığında təxminən 56 milyard ABŞ dollarına almaq üçün gözlənilməz təklif irəli sürərək “Wall Street”i təəccübləndirdi. Məqsəd “eBay”i “Amazon”a qarşı daha güclü rəqibə çevirmək idi.

Lakin “eBay”in direktorlar şurası təklifi rədd edərək onu "nə etibarlı, nə də cəlbedici" adlandırdı.

Koen bildirib ki, mükafat paketindən imtina etməsinin səbəbi “GameStop” rəhbərliyinin bütün diqqətini şirkətin əməliyyat fəaliyyətinə və planlaşdırılan satınalmaya yönəltmək istəyidir.

“GameStop”un qısa açıqlamasında qeyd olunub ki, şirkət bu həftə “eBay”lə bağlı planlarına dair əlavə materiallar, o cümlədən birləşdirilmiş şirkətin strateji əsaslandırılmasını və əməliyyat planını əhatə edən ətraflı təqdimatı dərc edəcək.

“eBay”in nümayəndəsi isə “GameStop”un açıqlamasını şərh etməkdən imtina edib.

Son həftələrdə “Wall Street”də Rayan Koenin “eBay”i almaq cəhdini necə davam etdirəcəyi ilə bağlı müzakirələr intensivləşib.

Xatırladaq ki, Koen 2021-ci ilin yanvarında “GameStop”un direktorlar şurasına qoşulub, 2023-cü ilin sentyabrında isə şirkətin baş icraçı direktoru təyin edilib.

Koen yüzlərlə mağazanın bağlanmasını da əhatə edən sərt xərclərin azaldılması tədbirləri sayəsində “GameStop”u yenidən mənfəətli fəaliyyətə qaytara bilib.

Mayya Hüseynova