"Strategy" 1,25 milyardlıq "Bitcoin" satışı edə bilər

Dünyanın ən böyük korporativ "Bitcoin" sahibi olan "Strategy" (keçmiş MicroStrategy) bu dəfə bazarın gözləntilərinə uyğun addım atıb.

Valyuta.az xəbər verir ki, şirkət yeni "Bitcoin" alışı etməyib və eyni zamanda 1,25 milyard dollara qədər "Bitcoin" sata biləcəyini açıqlayıb.

Şirkət bununla yanaşı, "Rəqəmsal Kredit Kapital Planı"nı (Digital Credit Capital Plan) təqdim edib və nağd pul ehtiyatını 1,4 milyard dollardan 2,55 milyard dollara yüksəldib.

"Strategy" bildirib ki, 2,55 milyard dollarlıq ehtiyat yalnız dividend və faiz ödənişlərinin maliyyələşdirilməsi üçün istifadə olunacaq. Şirkət eyni zamanda ən azı 12 aylıq ödəniş qabiliyyətini qorumağı hədəfləyir.

Yeni plan çərçivəsində ehtiyac yaranacağı təqdirdə, nağd vəsait ehtiyatını gücləndirmək məqsədilə 1,25 milyard dollara qədər "Bitcoin" satışı həyata keçirilə bilər. Satışdan əldə olunacaq vəsait dividend və faiz ödənişlərinin maliyyələşdirilməsinə yönəldilə bilər.

Bundan əlavə, "Strategy" bazardakı qeyri-sabitliyi əsas gətirərək 2 milyard dollarlıq səhm geri alışı proqramı elan edib. Proqrama əsasən, şirkət 1 milyard dollara qədər STRC və digər rəqəmsal kredit məhsullarını, həmçinin 1 milyard dollara qədər MSTR səhmlərini geri ala biləcək.

Şirkət həmçinin STRC səhmləri üzrə dividend gəlirliliyini 11,5%-dən 12%-ə qaldırdığını açıqlayıb. Bu addım bazar iştirakçıları tərəfindən uzun müddətdir gözlənilən qərarlardan biri hesab olunurdu.

Sərvanə Rəmixanova