Startapların investisiya cəlb etməsinə təsir edən 5 maraqlı amil

İnvestisiya cəlb etmək istəyən hər bir startap ilk növbədə güclü ideya, peşəkar komanda və dayanıqlı biznes modeli qurmağa çalışır. Ancaq araşdırmalar göstərir ki, investorların qərarına bəzən gözlənilməz amillər də təsir edir..

Valyuta.az xəbər verir ki, araşdırmalar startaplarda investisiya cəlb etməyə təsir edən 5 maraqlı tendensiyanı ortaya qoyub.

1. Fərqli adlara malik startaplar ilkin mərhələdə daha çox investisiya cəlb edir

"Venture Capital" jurnalında dərc olunan araşdırmaya görə, qeyri-adi və yadda qalan adlara malik startaplar investorların diqqətini daha çox çəkir. Xüsusilə biznesin ilk mərhələlərində fərqli ad şirkətin rəqiblər arasında seçilməsinə kömək edir.

2. Sonrakı mərhələlərdə fərqli ad üstünlük yaratmır

Şirkət böyüdükdən sonra investorlar artıq adla deyil, maliyyə nəticələri, gəlirlər və biznes modelinin dayanıqlılığı ilə maraqlanırlar. Araşdırmaya görə, bu mərhələdə qeyri-adi adlar hətta bəzi investorlar üçün mənfi təsir yarada bilər.

3. Kiçik şəhərlərdə fəaliyyət göstərən startaplar da böyük investisiyalar ala bilir

İnvestisiya almaq üçün mütləq San-Fransisko və ya Nyu-York kimi böyük şəhərlərdə fəaliyyət göstərmək vacib deyil. ABŞ-da Ostin, Plano və San Mateo kimi nisbətən kiçik şəhərlərdə də startaplar böyük həcmdə maliyyə cəlb edə bilirlər.

4. Böyük şəhərlərdə texnologiya startapları üstünlük təşkil edir

Araşdırmaya əsasən, iri şəhərlərdə investorlar əsasən texnologiya şirkətlərinə üstünlük verirlər. Kiçik şəhərlərdə isə texnologiyadan kənar sahələrdə fəaliyyət göstərən startaplar da daha çox maliyyələşmə əldə edə bilir.

5. Səhiyyə texnologiyaları investorların əsas diqqət mərkəzindədir

Xarici ölkələrdə biotexnologiya, əczaçılıq və digər səhiyyə texnologiyaları sahəsində fəaliyyət göstərən startaplar texnologiya sektorunda ən çox investisiya alan şirkətlər sırasında yer alır.

Sərvanə Rəmixanova