“TikTak”a yeni CEO təyin edildi

Təxminən 10 il ərzində “Uber” şirkətinin Türkiyə üzrə baş icraçı direktoru vəzifəsində çalışan, daha sonra isə “Wonderful” platformasının Türkiyə əməliyyatlarına rəhbərlik edən Neyran Arslantürk avtomobil paylaşım platforması “TikTak”ın yeni CEO-su təyin olunub.

Valyuta.az xəbər verir ki, Neyran Arslantürk bununla bağlı paylaşım edib.

Arslantürk paylaşımında vurğulayıb ki, “TikTak” hazırda 8 500 avtomobil və 3 milyondan çox istifadəçi ilə bazarda lider mövqedədir. O, açıqlamasında bildirib ki, şirkətin qurucusu Ersan Öztürkün yaratdığı möhkəm təməllər üzərində inkişafı davam etdirmək və komanda ilə birlikdə platformanı növbəti mərhələyə çıxarmaq əsas hədəflərdəndir.

Xatırladaq ki, ötən il “GetirAraç” platforması “TikTak” tərəfindən satın alınıb. “Anadolu Grubu” və Əbu-Dabi mərkəzli investisiya fondu “Mubadala” birgə sahib olduqları “GetirAraç”dakı paylarını “TikTak”a satdıqlarını açıqlamışdı. Şirkətin təxminən 22 milyon dollar dəyərində reallaşdırdığı bu satınalmanın əsas göstəriciləri də ictimaiyyətə təqdim olunub.

Mayya Hüseynova