"Bitcoin"də iyul ayı gözləntiləri: Analitiklər kritik qiymət səviyyələrini açıqladı

Kriptovalyuta bazarının ən böyük aktivi olan "Bitcoin" (BTC) iyun ayında təxminən 18,5 faiz dəyər itirərək son illərin ən kəskin aylıq enişlərindən birini yaşayıb. Hazırda 60 min dollar səviyyəsində möhkəmlənməyə çalışan "Bitcoin" üzrə investorların diqqəti iyul ayına yönəlib.

Valyuta.az-ın məlumatına görə, mütəxəssislər bildirirlər ki, texniki göstəricilər və tarixi statistika bazarın növbəti istiqamətini müəyyənləşdirmək baxımından mühüm siqnallar verir.

Qısa mövqelərin cəmləşməsi diqqət çəkir

Satış təzyiqinin davam etdiyi bir vaxtda "Binance" platformasında BTC/USDT cütlüyü üzrə likvidasiya istilik xəritəsi cari qiymətin bir qədər yuxarısında böyük həcmdə qısa (short) mövqelərin cəmləşdiyini göstərir.

Analitiklərin fikrincə, bu vəziyyət qiymətin kəskin yüksəlməsi halında "short squeeze" adlandırılan prosesə səbəb ola bilər. Bu halda qısa mövqedə olan investorlar zərərlərini məhdudlaşdırmaq üçün mövqelərini bağlamağa məcbur qalacaq ki, bu da qiymət artımını daha da sürətləndirə bilər.

67 645 dollar əsas müqavimət səviyyəsi hesab olunur

Texniki təhlilə əsasən, 67 645 dollar səviyyəsi bazar üçün mühüm müqavimət zonası hesab edilir.

Bu səviyyədə təxminən 247,39 milyon dollar həcmində ani likvidasiya riski, ümumilikdə isə 2,26 milyard dollar dəyərində qısa mövqe cəmləşib. Analitiklər qeyd edirlər ki, bu cür likvidlik zonaları qiymət hərəkətlərinin sürətlənməsinə səbəb ola bilər.

İyul statistikası nikbinlik yaradır

"CoinGlass"ın məlumatına görə, "Bitcoin" iyun aylarında orta hesabla 1,4 faiz ucuzlaşdığı halda, iyul aylarında orta hesabla 7,6 faiz bahalaşıb. Tarixi göstəricilərə əsasən, "Bitcoin" 2018-ci ilin iyulunda 20,96 faiz, 2022-ci ilin iyulunda isə 16,8 faiz yüksəlib.

Daha yaxın dövrdə isə kriptovalyuta 2024-cü ilin iyulunda 2,95 faiz, 2025-ci ilin iyulunda isə 8,13 faiz dəyər qazanıb.

Mümkün qiymət ssenariləri

Tarixi orta göstəricilər nəzərə alınarsa, iyul ayında orta hesabla 7,6 faizlik artım "Bitcoin"in qiymətini təxminən 64 500 dollara çatdıra bilər. Qiymətin 10,3 faiz artacağı təqdirdə isə məzənnənin 66 100 dollar səviyyəsinə yüksəlməsi mümkündür.

Daha güclü bərpa ssenarisində qiymətin 70–72,5 min dollar aralığına yüksələcəyi ehtimal olunur. Bəzi analitiklər optimist ssenaridə 75 min dollar səviyyəsinin də gündəmdə olduğunu bildirirlər.

Eniş riskləri hələ də qalır

Bununla yanaşı, texniki göstəricilər aşağı istiqamətli risklərin tam aradan qalxmadığını göstərir. Analitiklərin fikrincə, "Bitcoin"in 200 həftəlik sadə hərəkətli orta göstərici olan təxminən 62 445 dollar səviyyəsindən aşağıda ticarət olunması bazarda zəif tendensiyanın davam etdiyini göstərir.

Bundan əlavə, qrafikdə müşahidə olunan "ayı bayrağı" forması aşağı istiqamətdə qırılarsa, satış təzyiqi daha da güclənə bilər.

Mütəxəssislər hesab edirlər ki, "Bitcoin" yaxın müddətdə uzunmüddətli hərəkətli ortalamanın üzərinə qayıda bilməsə, qiymət 55 min dollar səviyyəsinə qədər geriləyə bilər.

Paşa Məmmədli