Azərbaycanda kriptoaktivlərlə bağlı metodologiya hazırlanıb

"Azərbaycanda kriptoaktivlərlə bağlı metodologiya üzrə hazırlıqlar tamamlanıb və sənədlərin razılaşdırılması prosesi davam edir".

Valyuta.az xəbər verir ki, bunu "AzFina"nın idarə heyətinin üzvü Rasim Xammədov Bakıda keçirilən "Azərbaycanın rəqəmsal maliyyə gündəliyi" mövzusunda öz çıxışında deyib.

"Kriptoaktivlərə yalnız investisiya aləti kimi yanaşmaq düzgün deyil. Hazırda proses 3 əsas istiqamətdə inkişaf etdirilir: metodologiya və qanunvericilik bazasının formalaşdırılması, istehlakçıların hüquqlarının qorunması, AML və kibertəhlükəsizlik risklərinin minimuma endirilməsi, həmçinin investorların hüquqlarının qorunaraq şəffaf bazar mühitinin yaradılması".

R.Xammədov bildirib ki, hazırda kriptoaktivlərə daha çox gələcəyin aləti kimi baxılır.

Onun sözlərinə görə, digər ölkələrin təcrübəsinin öyrənilməsi və tətbiqi risklərin azaldılmasına kömək edə, kiber təhlükəsizlik və çirkli pulların yuyulmasına qarşı mübarizə mexanizmlərinin gücləndirilməsi isə bu sahənin inkişafında mühüm rol oynaya bilər.