QR ödənişlərini dəstəkləyən POS-terminalların sayı 100 mini ötüb

"Hazırda ölkədə fəaliyyət göstərən 100 mindən çox POS-terminal artıq QR ödənişlərini dəstəkləyir".

Valyuta.az xəbər verir ki, bunu Azərbaycan Mərkəzi Bankının (AMB) Ödəniş sistemləri və məhsullarının inklüzivliyi departamentinin direktor müavini Ramil Mahmudov "Azərbaycanın Rəqəmsal Maliyyə Gündəliyi" mövzusunda keçirilən maarifləndirici tədbirdə bildirib.

Onun sözlərinə görə, bu, bazarda fintexlərin aktiv şəkildə istifadə edə biləcəyi, daha aşağı xərc tələb edən yeni ödəniş həllinin formalaşdığını göstərir.

R.Mahmudov qeyd edib ki, növbəti mərhələdə stiker əsaslı statik QR kodların tətbiqi nəzərdə tutulur: "Bu, ölkənin ən ucqar nöqtələrində belə nağdsız ödənişlərin qəbuluna imkan yaradacaq, dövriyyədə olan nağd pula tələbatı azaldacaq və nağdsız ödəniş vərdişlərinin formalaşmasına töhfə verəcək".

Tənzilə Ağabalayeva