Texnologiya tarixinin ən bahalı şirkət satınalmaları

Texnologiya sektoru tarix boyu milyardlarla dollarlıq satınalmalarla yadda qalıb. Böyük texnologiya şirkətləri bazardakı mövqelərini gücləndirmək, yeni texnologiyalara sahib olmaq və rəqiblər üzərində üstünlük qazanmaq məqsədilə rekord məbləğlər ödəyiblər. Son illərdə bu sövdələşmələrin həcmi daha da artıb və on milyardlarla dolları keçən razılaşmalar adi hala çevrilib.

1. Broadcom – VMware: 69 milyard dollar (2023)

ABŞ-ın çip istehsalçısı Broadcom bulud hesablama və virtuallaşdırma həlləri üzrə ixtisaslaşan VMware şirkətini təxminən 69 milyard dollara satın alıb. Bu razılaşma texnologiya tarixinin ən bahalı satınalmalarından biri hesab olunur. Sövdələşmə Broadcom-un korporativ proqram təminatı bazarındakı mövqeyini əhəmiyyətli dərəcədə gücləndirib.

2. Microsoft – Activision Blizzard: 68,7 milyard dollar (2023)

Microsoft oyun sənayesinin ən böyük sövdələşmələrindən birini həyata keçirərək Activision Blizzard-ı 68,7 milyard dollara satın alıb. Razılaşma nəticəsində "Call of Duty", "World of Warcraft", "Diablo" və "Candy Crush" kimi məşhur oyun franşizaları Microsoft-un nəzarətinə keçib. Bu satınalma şirkətin Xbox ekosistemini və bulud oyun xidmətlərini gücləndirmək strategiyasının əsas hissəsi hesab olunur.

3. Dell – EMC: 67 milyard dollar (2016)

Dell korporativ məlumat saxlama həlləri üzrə dünyanın aparıcı şirkətlərindən biri olan EMC-ni 67 milyard dollara satın alaraq uzun illər texnologiya tarixinin ən bahalı sövdələşməsinə imza atıb. Razılaşma Dell-in kompüter istehsalçısından kompleks korporativ texnologiya həlləri təqdim edən şirkətə çevrilməsində mühüm rol oynayıb.

4. Nvidia – ARM: 40 milyard dollar (2020)

Nvidia Böyük Britaniyanın ARM şirkətini SoftBank-dan 40 milyard dollara almaq barədə razılığa gəlsə də, müxtəlif ölkələrin tənzimləyici qurumlarının etirazları səbəbindən sövdələşmə sonradan ləğv edilib. Buna baxmayaraq, bu razılaşma elan edilən ən iri texnologiya satınalmalarından biri kimi tarixə düşüb.

5. IBM – Red Hat: 34 milyard dollar (2019)

IBM açıq mənbəli proqram təminatı hazırlayan Red Hat şirkətini 34 milyard dollara satın alıb. Bu, IBM tarixində ən böyük satınalma olub və şirkətin hibrid bulud texnologiyaları bazarında mövqeyini gücləndirməsinə imkan yaradıb.

6. Microsoft – LinkedIn: 26,2 milyard dollar (2016)

Microsoft peşəkar sosial şəbəkə platforması LinkedIn-i 26,2 milyard dollara satın alıb. Razılaşmadan sonra LinkedIn müstəqil fəaliyyətini davam etdirsə də, Microsoft-un məhsul və xidmətləri ilə daha sıx inteqrasiya olunub.

7. Hewlett-Packard – Compaq: 25 milyard dollar (2002)

Hewlett-Packard fərdi kompüter istehsalçısı Compaq-ı təxminən 25 milyard dollara satın alıb. Bu sövdələşmə uzun müddət texnologiya tarixinin ən mübahisəli satınalmalarından biri kimi qiymətləndirilib. Sonrakı illərdə HP yenidən strukturlaşdırılıb və iki müstəqil şirkətə bölünüb.

8. Meta – WhatsApp: 19 milyard dollar (2014)

O vaxt "Facebook" adlanan şirkət mesajlaşma platforması "WhatsApp"ı 19 milyard dollara satın alıb. Bu razılaşma sosial media tarixinin ən mühüm sövdələşmələrindən biri hesab olunur və Meta-nın qlobal mesajlaşma bazarında lider mövqeyini möhkəmləndirib.

9. Walmart – Flipkart: 16 milyard dollar (2018)

ABŞ-ın pərakəndə satış nəhəngi Walmart Hindistanın ən böyük elektron ticarət platformalarından biri olan Flipkart-ın nəzarət paketini 16 milyard dollara alıb. Sövdələşmə şirkətin Hindistan bazarında mövqeyini gücləndirməyə yönəlib.

10. Salesforce – Tableau: 15,7 milyard dollar (2019)

Salesforce məlumat analitikası platforması Tableau-nu səhmlərlə həyata keçirilən təxminən 15,7 milyard dollarlıq sövdələşmə ilə satın alıb. Bu addım şirkətin müştəri münasibətlərinin idarə olunması və analitika sahəsində imkanlarını genişləndirib.

11. Intel – Mobileye: 15,3 milyard dollar (2017)

Intel İsrailin avtonom idarəetmə texnologiyaları hazırlayan Mobileye şirkətini 15,3 milyard dollara satın alıb. Razılaşma Intel-in pilotsuz avtomobil texnologiyalarına yönəlmiş ən böyük investisiyalarından biri olub.

Tənzilə Ağabalayeva