"OpenAI"ın birjaya çıxışı 2027-ci ilə qədər təxirə düşə bilər

"OpenAI"ın uzun müddətdir gözlənilən ilkin kütləvi səhm təklifi (IPO) 2027-ci ilə qədər təxirə düşə bilər.

Valyuta.az xəbər verir ki, "Bloomberg"in məlumatına görə, "OpenAI"ın baş icraçı direktoru Sem Altman şirkəti daha aşağı dəyərləndirmə ilə birjaya çıxarmaqdansa, 1 trilyon dollarlıq bazar dəyəri hədəfinə çatmağı üstün tutur. Bu səbəbdən şirkətin IPO prosesinə tələsməyəcəyi bildirilir.

Məlumata görə, "OpenAI" bu ay "IPO" üçün məxfi müraciət etsə də, hələ investorlarla rəsmi görüşlərə başlamayıb və birjaya çıxış üçün dəqiq tarix açıqlamayıb.

Xəbərdə qeyd olunur ki, "IPO"nun gecikməsi şirkətin əsas investorlarından biri olan "SoftBank"a da təsir edib. Məlumat yayılandan sonra şirkətin səhmləri 13%-ə qədər ucuzlaşıb. Bildirilir ki, SoftBank-ın oktyabr ayınadək OpenAI-da təxminən 65 milyard dollar dəyərində paya sahib olacağı gözlənilir.

Analitiklərin fikrincə, "OpenAI"ın ehtiyatlı davranmasının əsas səbəblərindən biri süni intellekt sektorunda böyük infrastruktur və hesablama gücü investisiyalarının gələcəkdə nə dərəcədə səmərəli olacağı ilə bağlı artan suallardır. Bundan əlavə, şirkət birjaya çıxdıqdan sonra gəlirləri, xərcləri və maliyyə göstəriciləri investorların daha ciddi diqqət mərkəzində olacaq.