Zeynal Kərimzadə: "Bazarda rəqəmsallaşma prosesi hələ də düzgün istiqamətdə inkişaf etmir"

Azərbaycanda fəaliyyət göstərən sahibkarların böyük əksəriyyəti gələcəkdə rəqəmsallaşma prosesinə qoşulacaq. 

Valyuta.az xəbər verir ki, bu barədə Epoint-in qurucusu Zeynal Kərimzadə  "Azərbaycanın Rəqəmsal Maliyyə Gündəliyi" mövzusunda keçirilən maarifləndirici tədbirdə danışıb.

Onun sözlərinə görə, Vergi Xidmətinin açıqladığı məlumata əsasən, hazırda Azərbaycanda 882 min aktiv vergi ödəyicisi fəaliyyət göstərir. Onların 822 mini KOB subyektləridir. Bu isə o deməkdir ki, gec-tez bu sahibkarların hamısı rəqəmsallaşma prosesinə qoşulacaq və biznes xidmətlərinin böyük hissəsi rəqəmsal platformalar üzərindən təqdim olunacaq.

Z.Kərimzadə qeyd edib ki, buna baxmayaraq, hazırkı tendensiya göstərir ki, ümumiyyətlə sahibkarların 1 faizindən də azı rəqəmsallaşır.

"Bu vəziyyətin həm müsbət, həm də mənfi tərəfləri var. Mənfi tərəfi ondan ibarətdir ki, bazarda rəqəmsallaşma prosesi hələ də düzgün istiqamətdə inkişaf etmir", – deyə o əlavə edib.

Tənzilə Ağabalayeva