İlin ilk yarısında rusiyalı milyarderlər 4,8 milyard dollar qazanıblar

Rusiyalı milyarderlərin ümumi sərvəti 2026-cı ilin əvvəlindən etibarən 4,82 milyard dollar artıb.

Valyuta.az xəbər verir ki, bu barədə "Bloomberg Billionaires Index"in yenilənmiş məlumatında bildirilir.

Reytinqə əsasən, hesablamalar milyarderlərin sahib olduqları şirkətlərin səhmlərinin bazar dəyəri və onlara məxsus payların qiymətindəki dəyişikliklər əsasında aparılıb. "Bloomberg Billionaires Index"dünyanın ən varlı 500 nəfərini əhatə edir və hər gün yenilənir.

Ən böyük sərvət artımı "Severstal" şirkətinin əsas səhmdarı Aleksey Mordaşovda qeydə alınıb. Onun sərvəti ilin əvvəlindən 2,29 milyard dollar artaraq 28,6 milyard dollara çatıb.

Siyahıda növbəti yerdə "Novatek" şirkətinin rəhbəri Leonid Mixelson qərarlaşıb. Onun sərvəti 1,8 milyard dollar artaraq 25,5 milyard dollar olub.

"EuroChem" və SUEK şirkətlərinin təsisçisi Andrey Melniçenko 1,71 milyard dollar qazanaraq sərvətini 20,6 milyard dollara yüksəldib.

"Volga Group" şirkətinin rəhbəri Gennadi Timçenkonun sərvəti 1,15 milyard dollar artaraq 15,4 milyard dollara, UMMC-nin təsisçisi İskəndər Mahmudovun sərvəti isə 719 milyon dollar artaraq 8,6 milyard dollara çatıb.

Digər rusiyalı milyarderlər arasında da artım qeydə alınıb. Mixail Fridmanın sərvəti 588 milyon dollar artaraq 10,7 milyard dollara, Süleyman Kərimovun sərvəti 583 milyon dollar artaraq 11 milyard dollara yüksəlib. "Wildberries" şirkətinin təsisçisi Tatyana Kimin sərvəti isə 416 milyon dollar artaraq 8,3 milyard dollar olub.

Bununla yanaşı, bəzi milyarderlərin sərvətində azalma da müşahidə edilib.

Ən böyük itki Mixail Proxorovda qeydə alınıb. Onun sərvəti 5,46 milyard dollar azalaraq 11,1 milyard dollara düşüb.

Telegram-ın həmtəsisçisi Pavel Durovun sərvəti isə 2,21 milyard dollar azalaraq 12,2 milyard dollar təşkil edib. "Norilsk Nickel" şirkətinin prezidenti Vladimir Potanin də 1,08 milyard dollar itirərək sərvətini 25,3 milyard dollara endirib.

Sərvanə Rəmixanova