Maykl Seylor: "2036-cı ilə qədər "Bitcoin" daha geniş kütlə tərəfindən istifadə olunacaq"

"Strategy" şirkətinin təsisçisi və icraçı sədri Maykl Seylor bildirib ki, "Bitcoin"in qiymətini müəyyən edən əsas amil artıq 4 illik "halving" dövrləri deyil, institusional kapital axınları olacaq.

Valyuta.az xəbər verir ki, o, "X" sosial şəbəkəsində paylaşdığı yazıda qeyd edib ki, "Bitcoin" qlobal maliyyə sisteminə inteqrasiya olunduqca onun qiymətini yalnız "halving" və fərdi investorların davranışı ilə izah etmək mümkün deyil.

"Qarşıdakı 10 ildə "Bitcoin"in qiymətini yeni hasil olunan "Bitcoin" həcmi deyil, bazara daxil olan kapital axınları müəyyən edəcək", - deyə Seylor bildirib.

O, həmçinin "Bitcoin"in əsas üstünlüyünün dəyişməz protokola malik olması olduğunu vurğulayıb. Seylorun fikrincə, "Bitcoin" üçün ən böyük risk bazardan silinməsi deyil, əsas protokola düşünülməmiş dəyişikliklərin edilməsidir. Buna görə də əsas qatda dəyişikliklər yalnız geniş konsensus əldə olunduğu halda həyata keçirilməlidir.

M.Seylor hesab edir ki, 2036-cı ilə qədər "Bitcoin" daha geniş kütlə tərəfindən istifadə olunacaq, banklar, investisiya fondları və dövlətlərin ehtiyat aktivlərindən birinə çevriləcək. Onun sözlərinə görə, gələcəyin rəqəmsal maliyyə infrastrukturu da Bitcoin ekosistemi ətrafında formalaşacaq.

Sərvanə Rəmixanova