Trampın adını daşıyan kriptovalyuta investorları məyus etdi

Donald Trampın adı ilə bazara çıxarılan "$TRUMP" memkoin layihəsində təxminən 989 min investor maliyyə zərəri ilə üzləşib. 

Valyuta.az xəbər verir ki, investorların böyük əksəriyyəti vəsaitlərinin dəyərdən düşdüyünü görərkən, Prezident Donald Tramp bu layihədən əldə etdiyi gəlirin 600 milyon dolları ötdüyünü bəyan edib.

"Nansen" kriptoanalitika platformasının son hesabatına görə, Donald Trampın adı ilə bazara təqdim olunan "$TRUMP" memkoin layihəsi investorlar üçün ciddi maliyyə itkiləri ilə nəticələnib. Blokçeyn məlumatlarını təhlil edən mütəxəssislərin hesablamalarına əsasən, iyunun sonuna olan vəziyyətə görə təxminən 989 min nəfər bu rəqəmsal aktivə yatırdığı vəsaitə görə ciddi zərər çəkib. Bu isə o deməkdir ki, "$TRUMP" tokenini saxlayan hər üç investordan ikisi maliyyə itkisi ilə üzləşib.

Layihənin ilk təqdim olunduğu dövrdə bazarda böyük gözləntilər mövcud idi. "$TRUMP" tokeni ən yüksək həddə çatdığı vaxt 75,35 ABŞ dollarından alınıb-satılırdı və investorlar arasında böyük maraq doğurmuşdu.

Lakin vəziyyət qısa müddətdə dəyişib. Bazar günü tokenin qiyməti 1,69 ABŞ dollarına qədər geriləyib. Beləliklə, kriptovalyuta tarixi maksimum göstəricisi ilə müqayisədə təxminən 98 faiz dəyər itirib.

Donald Tramp öz adını daşıyan bu layihəni 2025-ci ildə keçirilən andiçmə mərasimindən az əvvəl elan etmişdi.

Oxşar vəziyyət Tramp və oğullarının təşəbbüsü olan "World Liberty Financial" platformasının "$WLFI" tokenində də müşahidə olunur. Həmin rəqəmsal aktiv də bazarda ciddi dəyər itkisi yaşayır.

İnvestorların ümumilikdə 3,8 milyard ABŞ dolları həcmində zərərlə üzləşdiyi bildirilir. Buna baxmayaraq, Prezident Donald Trampın maliyyə hesabatlarında fərqli mənzərə əks olunub.

Tramp son maliyyə bəyannaməsində "$TRUMP" memkoin layihəsindən 636 milyon ABŞ dolları gəlir əldə etdiyini bəyan edib. Məlumata görə, o, ötən il kriptovalyuta bazarından ümumilikdə 1,4 milyard ABŞ dolları qazanıb və bu məbləğin əhəmiyyətli hissəsi məhz bu layihənin payına düşür.

Tramp administrasiyası dövründə ABŞ-nin Qiymətli Kağızlar və Birja Komissiyası (SEC) bu tip memkoin layihələrinin qiymətli kağızlar haqqında qanunvericiliyin tənzimləmə dairəsinə daxil edilməyəcəyini açıqlayıb. Bundan əlavə, kriptovalyuta şirkətlərinə qarşı açılmış bəzi məhkəmə işlərinin də səssiz şəkildə bağlandığı bildirilir.

Ağ Ev isə açıqlamalarında Donald Trampın ABŞ-ni qlobal kriptovalyuta və rəqəmsal aktivlər mərkəzinə çevirmək niyyətini dəfələrlə vurğulayıb.

Paşa Məmmədli