İnsanlar smartfonlarını əslində nə qədər tez-tez dəyişir?

“Android Authority” portalı oxucuları arasında insanların smartfonlarını nə qədər tez-tez dəyişdirdiyini öyrənmək üçün sorğu keçirib. Nəticələr göstərib ki, bir çox istifadəçi cihazlardan uzun müddət istifadə etməyə üstünlük verir.

Valyuta.az xəbər verir ki, sorğuda 2 mindən çox insan iştirak edib. Onların yalnız 4 faizi hər il yeni smartfon aldığını bildirib. İki ildən bir cihaz dəyişənlərin payı 13,6 faiz, üç ildən bir dəyişənlərin payı isə 16 faiz təşkil edib.

Respondentlərin böyük hissəsi – 66 faizi smartfonlarını 4 ildən bir və ya daha gec dəyişdirdiyini açıqlayıb. Bu istifadəçilər cihaz işlək vəziyyətdə qaldığı müddətdə ondan istifadə etməyə üstünlük verirlər.

İyun ayında keçirilən digər bir sorğuda da 4000 iştirakçının 72 faizi telefonlarını üç ildən tez-tez yeniləmədiyini bildirib.

“Android Authority” bu tendensiyanı bir neçə amillə izah edir. Müasir smartfon modelləri nəsildən-nəslə əvvəlki qədər nəzərəçarpan yeniliklər əldə etmir. Eyni zamanda istehsalçılar proqram təminatına dəstəyi uzatmağa başlayıblar. Bəzi flaqman modellər üçün yeddi ilə qədər yeniləmə dəstəyi təqdim olunur.

Bu isə istifadəçilərə cihazlardan ciddi məhdudiyyətlər olmadan daha uzun müddət yararlanmağa imkan verir.

Flaqman smartfonların qiymətlərinin davamlı artması da mühüm rol oynayır. Getdikcə daha çox alıcı əhəmiyyətli dəyişiklikləri gözləməyi və ya köhnə cihaz zəiflədikdə, yaxud təhlükəsizlik yeniləmələrini almağı dayandırdıqda yeni telefon almağı üstün tutur.

Bu arada süni intellekt bumunun elektronika qiymətlərinin artmasına təsir göstərməyə davam etdiyi bildirilir. Çip çatışmazlığının ən azı 2028-ci ilə qədər davam edəcəyi gözlənilir.

Nəticədə “Samsung”, “Xiaomi” və digər Android markaları smartfonlarının qiymətlərini artırıb. Həmçinin “iPhone 18 Pro” modelinin ilkin qiymətinin 300 dollar arta biləcəyi qeyd olunur.

Paşa Məmmədli