İş yerində stresi azaltmağın 5 effektiv yolu

İş yerində artan stress təkcə əməkdaşların psixoloji və fiziki sağlamlığına deyil, həm də şirkətlərin məhsuldarlığına mənfi təsir göstərir. Düzgün iş mühiti formalaşdırmaqla bu riskləri əhəmiyyətli dərəcədə azaltmaq mümkündür.

Valyuta.az xəbər verir ki, "CoreHealth Technologies" tərəfindən yayımlanan araşdırmada iş yerində stressi azaltmağın beş əsas yolu açıqlanıb.

Araşdırmaya görə, "Mental Health America" təşkilatının sorğusunda stressli iş mühitində çalışan əməkdaşların 81%-i bunun psixi sağlamlıqlarına mənfi təsir göstərdiyini bildirib.

Belə ki, yüksək iş yükü, qısa son tarixlər və daim əlçatan olmaq tələbi iş yerində xroniki stressin əsas səbəblərindəndir. Bundan əlavə, əməkdaşların fikirlərinin nəzərə alınmaması, həddindən artıq nəzarət (mikromenecment), yüksək gözləntilər fonunda qərarvermə imkanlarının məhdud olması da iş mühitini daha gərgin edir.

Araşdırmada stressin azaldılması üçün şirkətlərə aşağıdakı addımlar tövsiyə olunur:

1. Fiziki aktivliyi təşviq edin

Müntəzəm idman edən insanların daha az narahatlıq keçirdiyi, diqqətini daha yaxşı cəmlədiyi və özünü daha enerjili hiss etdiyi bildirilir. Şirkətlərdə sağlamlıq proqramlarının tətbiqi əməkdaşların fiziki aktivliyini artırır.

2. Vaxtın düzgün idarə olunmasını dəstəkləyin

Vaxtın effektiv planlaşdırılması işçilərin tapşırıqları daha rahat yerinə yetirməsinə, tələskənlik və gərginliyin azalmasına kömək edir. Bunun üçün əməkdaşlara vaxtın idarə olunması üzrə təlimlər keçirmək, fasilələri təşviq etmək və məzuniyyət hüququna hörmətlə yanaşmaq tövsiyə edilir.

3. Mindfulness (şüurlu fərqindəlik) təcrübələrindən istifadə edin

Meditasiya, nəfəs məşqləri və diqqətin indiki ana yönəldilməsi kimi üsulların stressin azalmasına müsbət təsir göstərdiyi qeyd olunur. Mütəxəssislər bu təcrübələrin ilk növbədə rəhbərlər tərəfindən təşviq edilməsinin vacib olduğunu bildirirlər.

4. İş və şəxsi həyat balansını qoruyun

Araşdırmada çevik iş qrafiki, psixi sağlamlığa dəstək və əməkdaşların istirahət etməsinə şərait yaradılmasının tükənmişlik (burnout) riskini azaltdığı vurğulanır.

5. Dəstəkləyici korporativ mədəniyyət formalaşdırın

Ekspertlərin fikrincə, açıq ünsiyyət, şəffaflıq və əməkdaşlara qarşı empatik yanaşma iş yerində sağlam mühitin formalaşmasına kömək edir. Sağlamlıq proqramlarının tətbiqi isə işçilərin rifahına verilən önəmin göstəricisi hesab olunur.

Araşdırmada həmçinin qeyd edilir ki, rəqəmsal sağlamlıq platformaları və korporativ sağlamlıq proqramları əməkdaşların fiziki və psixoloji rifahını izləməyə, sağlam vərdişlər formalaşdırmağa və iş yerində stressin idarə olunmasını daha effektiv təşkil etməyə imkan verir. Bu da uzunmüddətli perspektivdə daha motivasiyalı, sağlam və məhsuldar işçi qüvvəsinin formalaşmasına töhfə verir.

Sərvanə Rəmixanova