"Alibaba"nın dəstəklədiyi startap yeni süni intellekt modelini təqdim edib

Çinin süni intellekt startapı "Moonshot" 2,8 trilyon parametrə malik "Kimi K3" modelini təqdim edib. 

Valyuta.az xəbər verir ki, bu, dünyanın ən böyük açıq çəkili  süni intellekt modelidir və məhsuldarlıq baxımından ABŞ-ın qabaqcıl sistemlərinə yaxın nəticələr göstərir.

"Kimi K3" 1 milyon tokenlik kontekst pəncərəsinə malikdir. Bu isə modelə əvvəlki nəsil sistemlərlə müqayisədə daha çox məlumatı bir sorğu çərçivəsində emal etməyə və uzunmüddətli tapşırıqları daha effektiv yerinə yetirməyə imkan verir.

Məlumata əsasən, model məntiqi mühakimə, proqramlaşdırma və bilik əsaslı tapşırıqlarda yüksək nəticələr göstərir. GPU optimallaşdırılması testlərində isə "Kimi K3"ün "Anthropic"in bəzi qabaqcıl modelləri və "OpenAI"ın "GPT-5.5" modeli ilə müqayisədə rəqabətədavamlı olduğu qeyd olunub.

Model üçüncü tərəf qiymətləndirmələrində də yüksək nəticələr əldə edib. "Arena.ai" "Kimi K3"ü veb interfeyslərinin yaradılması üzrə testdə birinci yerə layiq görüb.

"Vals AI" modeli ümumi reytinqdə ikinci, "Artificial Analysis" isə mürəkkəb çoxmərhələli tapşırıqlarda onu ABŞ-ın aparıcı modelləri ilə müqayisə oluna biləcək səviyyədə qiymətləndirib.

Qeyd edək ki, "Moonshot" "Alibaba" və "Tencent" kimi texnologiya nəhənglərinin dəstəklədiyi Çin startaplarından biridir.

Rəfiqə Abdin