Mərkəzi Bankın 3,8 milyon manatlıq 5 tenderi gələn ay yekunlaşacaq

Mərkəzi Bankın (AMB) gələn ay yekunlaşması gözlənilən 5 tenderinin ümumi ehtimal olunan dəyəri 3 milyon 809 min 113,47 manat təşkil edir.

Valyuta.az xəbər verir ki, bu tenderlər yeni binanın avadanlıqları üçün ehtiyat hissələrinin, korporativ stil məhsullarının, şəbəkə təhlükəsizliyi avadanlıqlarının, bina və avadanlıqların sığortalanması xidmətinin, həmçinin inzibati binalarda istismar olunan su, kanalizasiya, isitmə-soyutma, havalandırma sistemləri və avadanlıqları ilə bağlı xidmətlərin satın alınmasını əhatə edir.

Tenderlər arasında ən yüksək ehtimal olunan qiymət 2 milyon 405 min 945,12 manat olmaqla inzibati binalarda istismar olunan su, kanalizasiya, isitmə-soyutma, havalandırma sistemləri və avadanlıqları üçün xidmətlərin satın alınmasına aiddir. Ən aşağı məbləğ isə 68 min 407,55 manat olmaqla bina və avadanlıqların sığortalanması xidmətinin satın alınması üzrə tender üçün nəzərdə tutulub.

Qeyd edək ki, AMB-nin yeni binasının avadanlıqları üçün ehtiyat hissələrinin satın alınması ilə bağlı tenderin ehtimal olunan qiyməti 129 min 404,37 manat təşkil edir. Tender üzrə təkliflər avqustun 7-dək, digər 4 tender üzrə isə avqustun 10-dək qəbul olunacaq.

Sərvanə Rəmixanova