Səyahət agentliyi 60 milyon dollar investisiya cəlb edib

Səyahət agentliyi “Fora” “Forerunner” və “Tactile Ventures” şirkətlərinin rəhbərlik etdiyi D seriyası investisiya mərhələsində 60 milyon ABŞ dolları həcmində maliyyə cəlb etdiyini açıqlayıb.

Valyuta.az xəbər verir ki, bu investisiyadan sonra şirkətin bazar dəyəri 1 milyard ABŞ dollarına çataraq onu unicorn statusuna yüksəldib.

2021-ci ildə təsis edilən “Fora” iki istiqamətdən ibarət platformadır. Şirkət istifadəçilərə müştərilərlə əlaqələrin idarə olunması və səyahətlərin planlaşdırılması üçün zəruri infrastruktur təqdim etməklə onların asanlıqla səyahət agenti kimi fəaliyyət göstərməsinə imkan yaradır. Eyni zamanda platforma bal ayı, ailə istirahəti və digər məqsədlərlə Kosta-Rika, Tayland kimi istiqamətlərə səyahət planlaşdıran istifadəçilərə peşəkar məsləhətçilər tapmaq və onlarla əlaqə saxlamaq imkanı verir.

Şirkətin məlumatına görə, bu günədək cəlb olunan ümumi investisiya məbləği 138,5 milyon ABŞ dollarına çatıb.

Yeni maliyyənin bir hissəsi platformadakı səyahət agentlərinə araşdırma aparmaq, marşrut hazırlamaq və digər vaxt aparan inzibati işlərdə kömək edən “Via” adlı süni intellekt köməkçisinin inkişafına yönəldiləcək. Şirkətin bildirdiyinə görə, məqsəd süni intellekt vasitəsilə agentləri əvəz etmək deyil, onların məhsuldarlığını artırmaq və müştərilərlə münasibətlərin qurulmasına daha çox vaxt ayırmalarını təmin etməkdir.

“Fora”nın açıqlamasına əsasən, fəaliyyətə başladığı vaxtdan etibarən platformadakı agentlər ümumi dəyəri 3 milyard ABŞ dollarından çox olan səyahət sifarişləri həyata keçiriblər. Platformada fəaliyyət göstərən agentlərin əksəriyyəti isə səyahət məsləhətçiliyi sahəsinə yeni qoşulan şəxslərdir.

Şirkət cəlb olunan vəsait hesabına komandasını genişləndirməyi, həmçinin kruizlər, aviareyslər və digər səyahət seqmentlərində fəaliyyətini daha da inkişaf etdirməyi planlaşdırır.

Mayya Hüseynova