Lüks bazarında sürpriz: "Richemont" analitiklərin gözləntilərini ikiqat üstələdi

İsveçrənin lüks məhsullar istehsalçısı "Richemont" qlobal zərgərlik bazarındakı davamlı artım sayəsində analitiklərin satış proqnozlarını əhəmiyyətli dərəcədə üstələyib.

Valyuta.az şirkətin açıqlamasına istinadən xəbər verir ki, 30 iyun tarixində başa çatan 2027-ci maliyyə ilinin birinci rübündə satışlar sabit valyuta məzənnələri əsasında 20 faiz artaraq 6,3 milyard avroya çatıb.

"Bernstein" investisiya şirkətinin analitiki Luka Solka qeyd edib ki, "Richemont" bazarın gözləntilərini tamamilə geridə qoyub. Şirkətin 20 faizlik üzvi artımı analitiklərin proqnozlaşdırdığı 11 faizlik göstəricidən demək olar ki, iki dəfə yüksək olub.

Tərkibində "Cartier", "Van Cleef & Arpels", "Buccellati" və "Vhernier" kimi məşhur brendləri birləşdirən "Richemont"un zərgərlik bölməsi ilk rübdə 24 faiz böyüyərək 4,7 milyard avro dövriyyə əldə edib. Bu göstərici əvvəlki rübdə qeydə alınan 16 faizlik artımı da üstələyib.

"Vacheron Constantin" və "Piaget" kimi saat istehsalçılarının satışları isə 8 faiz artaraq 873 milyon avroya yüksəlib. "Chloé" və "Alaïa" kimi moda brendlərini əhatə edən digər biznes istiqamətlərində isə artım 9 faiz təşkil edib.

Şirkətin nəticələri göstərir ki, geyim və aksessuar kimi "yumşaq lüks" seqmentində zəif dinamika müşahidə olunsa da, zərgərlik sektoru böyümənin əsas mənbəyi olaraq qalır.

Analitiklər iyulun 27-də maliyyə nəticələrini açıqlayacaq "LVMH" şirkətinin moda və aksessuar satışlarında 1 faiz, saat və zərgərlik bölməsində isə 8 faiz artım elan edəcəyini gözləyirlər. İyulun 28-də hesabat təqdim edəcək "Kering" şirkətinin ümumi satışlarının 2 faiz, zərgərlik satışlarının isə 18 faiz artacağı proqnozlaşdırılır.

Coğrafi bölgülərə əsasən, "Richemont"un birinci rübdə ən yüksək artımı Yaponiya (36 faiz), Amerika qitəsi (27 faiz) və Asiya-Sakit okean regionunda (21 faiz) qeydə alınıb.

Analitik Luka Solka Yaponiyanın nəticələrini dövrün ən böyük sürprizi adlandırıb. Onun sözlərinə görə, buna güclü daxili tələbat və turist xərclərinin artması səbəb olub. Bundan əlavə, ötən ilin eyni dövründə Yaponiyada satışların 15 faiz azalması cari ilin müqayisə bazasını daha əlverişli edib.

Çində lüks məhsullara tələbatla bağlı narahatlıqlara baxmayaraq, Çin, Honq Konq və Makao daxil olmaqla Asiya-Sakit okean bazarında ikirəqəmli artım müşahidə olunub. "Deutsche Bank" analitikləri bunu müsbət göstərici kimi qiymətləndiriblər.

Şirkət xüsusilə Cənubi Koreya və Tayvanda yüksək artım nümayiş etdirib. Analitiklərin fikrincə, Cənubi Koreyada texnologiya sektorunun sürətli inkişafı nəticəsində yaranan rifah artımı ölkəni lüks məhsullar bazarında əsas istiqamətlərdən birinə çevirib.

Avropada satışlar yerli alıcılarla yanaşı, ABŞ və Yaxın Şərqdən gələn turistlərin hesabına 11 faiz artaraq 1,4 milyard avroya çatıb. Yaxın Şərq və Afrika regionunda isə satışlar 3 faiz yüksəlib. Burada güclü yerli tələbat turist xərclərindəki zəifliyi kompensasiya edib.

"Visible Alpha" konsensus proqnozuna əsasən, "Richemont"un satışlarının 2026-cı ildə 8,8 faiz artacağı gözlənilir.

"Bernstein" analitiki Luka Solka bildirib ki, maliyyə ilinə uğurlu başlanğıc fonunda 2027-ci maliyyə ili üzrə proqnozların yuxarı istiqamətdə yenilənməsi ehtimalı yüksəkdir. Onun sözlərinə görə, "Richemont" lüks sektorunda ən perspektivli şirkətlərdən biri olaraq qalır.

"Deutsche Bank" analitikləri isə qeyd ediblər ki, bu nəticələr ümumilikdə lüks sənayesi üçün müsbət siqnaldır. Bununla belə, əldə olunan uğurun nə dərəcədə ümumi bazar canlanması, zərgərlik seqmentinin güclənməsi və ya məhz "Richemont"un fərdi uğuru ilə bağlı olduğu qarşıdakı dövrdə daha aydın məlum olacaq.

Paşa Məmmədli