Bank sektorunda 10 il işlədikdən sonra aqrotexnologiya laboratoriyası yaradıb

Qazaxıstanlı sahibkar Asxat Janibekov bank sektorunda təxminən 10 il çalışdıqdan sonra “Nazarbayev University” bazasında “AgriFoodTech Venture Lab” adlı yeni vençur laboratoriyasını istifadəyə verib.

Valyuta.az "TheTech"ə istinadən xəbər verir ki, layihə onun heyvandarlıq təsərrüfatlarının uzaqdan monitorinqi və idarə olunması üçün hazırlanmış “COWMAS” startapının davamı kimi yaradılıb.

Sistem süni intellekt və analitika vasitəsilə heyvanların sağlamlıq vəziyyətini izləməyə, təsərrüfatlarda əməliyyat proseslərini optimallaşdırmağa imkan verir.

Janibekovun sözlərinə görə, ideya 2017-ci ildə aqrobiznes iqtisadiyyatını öyrənmək üçün Niderlanda köçdükdən sonra formalaşıb. Qazaxıstana qayıtdıqdan sonra o, heyvandarlıq sahəsində rəqəmsal həllərin hazırlanmasına başlayıb.

“COWMAS” ətrafında yeni texnoloji istiqamətlərin yaranması nəticəsində “AgriFoodTech Venture Lab” təsis edilib. Laboratoriya üç əsas istiqamətdə fəaliyyət göstərir: yeni startapların yaradılması, akademik konsaltinq və elmi işləmələrin kommersiyalaşdırılması.

Layihənin inkişafında “NURIS” texnoparkı və universitetin elmi infrastrukturu mühüm rol oynayıb. Komanda hazırda robototexnika və kompüter görməsi sahələrində də layihələr həyata keçirir.

Sahibkarın sözlərinə görə, əsas çətinliklər kənd təsərrüfatı sektorunda keyfiyyətli məlumat bazasının zəif olması, ucqar bölgələrdə internet və enerji infrastrukturunun məhdudluğu, eləcə də innovativ təşəbbüslərin dəstəklənməsi mexanizmlərinin yetərincə inkişaf etməməsidir.

Janibekov hesab edir ki, ərzaq təhlükəsizliyi və iqlim dəyişiklikləri kimi qlobal çağırışlar fonunda elm və aqrobiznes arasında əlaqələrin gücləndirilməsi vacibdir. Bu məqsədlə yaradılan “AgriFoodTech Venture Lab” elmi tədqiqatların bazara çıxarılmasını sürətləndirməyi hədəfləyir.

Mayya Hüseynova