Azərbaycanlı gənclər restoranlara qazandıran startap yaradıblar

Azərbaycanda yaradılan “SnackPack” mobil tətbiqi qida tullantılarını azaltmağa və kafe-restoranlara səfərləri daha sərfəli etməyə kömək edən platformadır.

Valyuta.az xəbər verir ki, tətbiq istifadəçilərə günün müəyyən saatlarında çörəkxana, restoran və otellərin endirimli təkliflərindən yararlanmaq imkanı yaradır. Modelin əsas məqsədi satılmadan qala biləcək qida məhsullarının israfının qarşısını almaqdır.

Layihənin təsisçisi “SnackPack” şirkətinin baş direktoru Ramil Tağıyevdir. O, startapı 2022-ci ildə qardaşı Emil Tağıyevlə birlikdə yaradıb.

Sonradan layihənin inkişafı ilə əlaqədar komanda genişlənib. Cavidan Bayramlı vizual mövqeləndirmə və sosial şəbəkələrin idarə olunması istiqamətində komandaya qoşulub. Ataxan Əhmədov platformada yeni müəssisələrin cəlb olunması və tərəfdaşlıq əlaqələrinin qurulması ilə məşğuldur. Daha sonra Aydın Təhməsibi də komandaya daxil olaraq müəssisələrlə əməkdaşlıq istiqamətində fəaliyyət göstərməyə başlayıb.

Startap ideyası informasiya texnologiyalarına maraq və sosial yönümlü layihə yaratmaq istəyi nəticəsində yaranıb. Komanda ilkin mərhələdə həm istifadəçilər, həm də kafe və restoran sahibləri ilə görüşərək bazarı araşdırıb.

Azərbaycanda mövcud olan “axşam bazarı” modeli diqqət çəkib. Bu model günün sonunda satılmamış qidaların daha aşağı qiymətə satılmasını nəzərdə tutur. Lakin bu sistem rəqəmsal formada tətbiq olunmurdu. Buna görə də ideyanı mobil tətbiq formatında həyata keçirmək qərara alınıb.

Layihə inkişaf mərhələsində bir sıra qrant və investisiyalar əldə edib. 2024-cü ildə Heydər Əliyev Fondunun və “RIIB” təşkilatının keçirdiyi müsabiqədə “SnackPack” “Sosial layihə” nominasiyası üzrə 3000 ABŞ dolları qrant qazanıb. Daha sonra Azərbaycan Respublikasının Mədəniyyət Nazirliyi və “ICESCO” tərəfindən təşkil olunan beynəlxalq müsabiqədə 10 000 ABŞ dolları qrant əldə edib.

Həmin ilin dekabrında Kiçik və Orta Biznesin İnkişafı Agentliyi (“KOBIA”) tərəfindən layihəyə daha 10 000 ABŞ dolları qrant verilib. Bundan əlavə, komanda “IT Park Uzbekistan” tərəfindən keçirilən “Digital Startup Awards” inkubasiya proqramı çərçivəsində 10 000 ABŞ dolları investisiya cəlb edib.

Mayya Hüseynova