"PayPal Ventures" yeni investisiyaları dayandırdı

"PayPal"ın korporativ vençur investisiya qolu olan "PayPal Ventures" yeni investisiyaları müvəqqəti olaraq dayandırıb.

Valyuta.az xəbər verir ki, qərar şirkətdə aparılan yenidənqurma prosesi çərçivəsində qəbul edilib. "PayPal" hazırda investisiya qolunun gələcəyi ilə bağlı müxtəlif strateji variantları dəyərləndirir.

2016-cı ildə yaradılan "PayPal Ventures" bu günə qədər 80-dən çox şirkətə investisiya yatırıb. Portfelində "Plaid", "Talos Global" və "Anchorage Digital" kimi tanınmış şirkətlər yer alır. Fondun ümumi həcmi isə 850 milyon dollar təşkil edir.

"PayPal Ventures" bağlanmasa da, hazırda yalnız mövcud portfel şirkətlərini dəstəkləyir və yeni investisiyalar etmir. Bildirilir ki, komandanın sayı da 10 nəfərdən iki nəfərə qədər azaldılıb.

Mütəxəssislər hesab edirlər ki, bu addım "PayPal"ın əsas biznes istiqamətlərinə fokuslanmaq və xərcləri optimallaşdırmaq strategiyasının tərkib hissəsidir.