BMW imperiyası "Volkswagen"dən daha tez çökə bilər

Almaniyanın avtomobil istehsalçısı BMW 2026-cı ilin yekunlarına görə avtomobil biznesinin gəlirlilik proqnozunu 6 faizdən 1 faizə endirib. Şirkət ssenarinin pisləşməsini Yaxın Şərqdəki münaqişə fonunda tələbatın zəifləməsi ilə əlaqələndirib. 

Valyuta.az xəbər verir ki, bu barədə "Bloomberg" məlumat yayıb.

Şirkət üçün ən böyük narahatlıq mənbəyi Çin bazarıdır. May ayında Çində avtomobil satışları ötən ilin eyni dövrü ilə müqayisədə 20 faizdən çox azalıb. BMW-nin satışlarının əsas hissəsini təşkil etməyə davam edən daxili yanma mühərrikli avtomobillərə tələbat isə təxminən 40 faiz geriləyib.

Digər Alman avtomobil nəhəngi olan "Volkswagen" hazırda əməliyyat mənfəət marjasının ən azı 4 faiz olacağını gözləyir. Bu isə şirkətin proqnozlarının "BMW" ilə müqayisədə daha optimist olduğunu göstərir.

Bundan əvvəl "Volkswagen" rəhbərliyi konsernin gələcəyi ilə bağlı ciddi risklərin yarandığını bəyan etmişdi. "Der Spiegel"in yaydığı məlumata görə, şirkətin yüksək rəhbər heyəti arasında keçirilmiş anonim daxili sorğunun nəticələri vəziyyətin əvvəl düşünüləndən daha ciddi olduğunu ortaya qoyub.

Sorğuda iştirak edən idarə heyətinin doqquz üzvündən altısı konsernin hazırkı durumunu “mövcudluğunu təhdid edən” vəziyyət kimi qiymətləndirib. Qalan üç top-menecer isə vəziyyəti “gərgin” adlandırıb. Heç bir respondent “kritik olmayan” variantını seçməyib.

Bununla yanaşı, bütün doqquz iştirakçı bir məsələdə həmfikir olub: xüsusilə Çin və Şimali Amerika bazarlarında şirkətin strategiyasının köklü şəkildə yenidən nəzərdən keçirilməsinə ehtiyac var.

Ekspertlərin fikrincə, həm BMW, həm də "Volkswagen" üçün əsas problemlərdən biri Çin avtomobil bazarında rəqabətin kəskinləşməsidir. Yerli elektrik avtomobili istehsalçılarının sürətli yüksəlişi ənənəvi Avropa markalarının bazar payına ciddi təsir göstərir.

Paşa Məmmədli