Hansı avtomobillər dəyərini daha yaxşı qoruyur?

Yeni və ya ikinci əl avtomobil almağı planlaşdıranlar üçün ən vacib məsələlərdən biri nəqliyyat vasitəsinin gələcəkdə nə qədər dəyər saxlayacağıdır.

ABŞ-ın avtomobil bazarı üzrə tanınmış mənbələrindən olan "Kelley Blue Book"un (KBB) son araşdırmasına görə, pikaplar, hibrid modellər və idman avtomobilləri illər keçdikcə dəyərini daha yaxşı qoruyur.

Əksinə, elektrik avtomobilləri və iri ölçülü lüks modellər daha sürətlə qiymət itirir.

Mütəxəssislər avtomobilin təkrar satış qiymətinə təsir edən əsas amilləri açıqlayıblar:

Etibarlılıq əsas amillərdən biridir

İkinci əl avtomobil alıcıları uzun müddət problemsiz istifadə edə biləcəkləri modellərə üstünlük verirlər. "AutoInsurance.org"un avtomobil eksperti Melani Mussonun sözlərinə görə, yüksək yürüş göstəricisinə baxmayaraq uzunömürlü avtomobillər bazarda daha yüksək qiymətlə satılır.

Bu səbəbdən "Toyota", "Lexus", "Honda" və "Subaru" markaları uzun illərdir öz dəyərlərini qoruyan avtomobillər sırasında yer alır. Həmin markalar etibarlılıq reytinqlərində daim ön sıralarda qərarlaşır.

Texniki xidmət xərcləri də vacibdir

Mütəxəssislərin fikrincə, texniki xidmətin əlçatan və münasib olması avtomobilin bazar dəyərinin qorunmasında mühüm rol oynayır.

"German Car Depot" şirkətinin mütəxəssisi Alan Gelfand bildirir ki, geniş servis şəbəkəsinə malik, ehtiyat hissələri asan tapılan və sadə konstruksiyalı avtomobillər daha az xərc tələb etdiyi üçün alıcılar arasında daha çox maraq doğurur.

Elektrik avtomobilləri niyə daha sürətlə ucuzlaşır?

"ISeeCars.com"un məlumatına görə, elektrik avtomobilləri ilk beş il ərzində orta hesabla dəyərinin 57,2 faizini itirir.

Ekspertlər bunu əsasən batareyaların köhnəlməsi ilə əlaqələndirirlər. Zaman keçdikcə batareyanın enerji tutumu azalır və onun dəyişdirilməsi olduqca bahalı başa gəlir.

"Car and Driver" nəşrinin məlumatına görə, elektrik avtomobillərinin batareyaları orta hesabla 8-12 il xidmət göstərir.

Yanacaq sərfiyyatı alıcıların seçimlərinə təsir edir

İkinci əl bazarında yanacağa qənaət edən avtomobillər daha çox tələb görür. Xüsusilə hibrid modellər və aşağı yanacaq sərfiyyatına malik ailə avtomobilləri qiymətlərini daha yaxşı qoruyur.

Alan Gelfand qeyd edir ki, yüksək yanacaq səmərəliliyi təkrar satış bazarında mühüm üstünlüklərdən biridir.

Həvəskarların maraq göstərdiyi modellər

Bəzi avtomobillər isə sırf həvəskarların marağı sayəsində dəyərini qoruyur. Məsələn, yolsuzluq avtomobilləri və müəyyən idman modelləri uzun illər keçsə belə yüksək qiymətlə satılır.

Ekspertlərin sözlərinə görə, "'Toyota Tacoma'" və "'Toyota 4Runner'" kimi modellər möhkəmliyi və etibarlılığı səbəbindən yolsuzluq həvəskarları arasında böyük tələbat görür.

"Nero Line" şirkətinin rəhbəri Saymon Qranvil isə bildirir ki, superavtomobil bazarında mexaniki sürətlər qutusu ilə təchiz olunan modellər daha yüksək qiymətlə satılır.

Onun sözlərinə görə, belə avtomobillər avtomatik transmissiyalı analoqları ilə müqayisədə təkrar satış zamanı 15-25 faiz daha baha qiymətləndirilə bilər.

Tənzilə Ağabalayeva